Charter Document - 05180243
Charter Number: | 05180243 |
---|---|
Cartulary Title: | Coventry and Lichfield 1215-1256 Volume 43 |
Charter Language: | Latin |
Charter Origin: | Religious |
Charter Type(s): | Letter |
Date: | 1255 |
Date type: | Internal, A.D., Feast |
Resource Link(s): |
|
Charter:
Rogerus Dei gratia Coventr et Lich episcopus dilecto in Cristo filio archidiacono Derbeye salutem gratiam et benedictionem Cum per quondam bone memorie dominum Alexandrum episcopum predecessorem nostrum tres prebende in ecclesia nostra Lich de communi concensu decani et capituli eiusdem ecclesie fuerint ordinate prout in eiusdem predecessoris nostri litteris super hoc confectis plenius continetur quarum una in quatuor marcis altera vero in totidem et tertia in tribus marcis sterlingorum de denariis beati Petri in archidiaconatu Derbeye nos et successores nostros contingentibus per archidiaconum loci annuatim percipiendis consistit nosque unam de quatuor marcis dilecto in Cristo filio domino Rogero Rusteing alteram vero de totidem marcis dilecto in Cristo filio domino Nicholao de Lega et illam de tribus marcis dilecto in Cristo filio domino Thome de Bradeford canonice contulerimus et quamquam in ordinatione dicti predecessoris nostri contineatur quod peccunia dictis canonicis solvenda ad duos anni terminos solvi debeat nos tamen veraciter perpendentes dictis canonicis ecclesie nostre onera supportantibus commodum accrescere si pecuniam quam in hac parte diversis temporibus et terminis consueverunt percipere uno termino singulis annis percipiant de voluntate et consensu dilectorum in Cristo filiorum decani et capituli Lich volumus et statuimus quod canonici antedicti prefatam peccuniam in octabis assumptionis beate Marie virginis singulis annis apud Lich percipiant Unde vobis mandamus quatinus eisdem dominis Rogero Nicholao et Thome prenotatam pecuniam nomine prebendarum suarum ut premissum est annuatim debitam de portione dictorum denariorum nos contingente per decanum vestrum Derbeye solvi faciatis termino predicto Dat apud Heywode in crastino decollationis sancti Iohannis baptiste anno gratie millesimo ducentesimo quinquagesimo quinto et pontificatus nostri anno undecimo