Charter Document - 05180239
| Charter Number: | 05180239 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1250 |
| Date type: | Internal, Calendar, Episcopal |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Rogerus miseratione divina Coventr et Lich episcopus salutem in Domino sempiternam Noverit vestra universitas quod cum capitulo ecclesie nostre Lich a bone memorie Willelmo episcopo predecessore nostro specialiter sit concessum quod decanatu ecclesie vacante liberam eligendi sibi decanum habeant inperpetuum potestatem quam quidem electionem felicis recordationis papa Honorius predicto capitulo confirmavit de qua etiam electione Nicholaus Tusculanus episcopus aliquando apostolice sedis legatus testimonium perhibet ut inspectione autenticorum instrumentorum eorundem perpendimus evidenter nos quod eidem capitulo in hac parte ad pacem et augmentationem honoris ecclesie concessum est ratum et gratum habentes liberam ei decani electionem inperpetuum concedimus et episcopali auctoritate confirmamus Et in huius rei memoriam perpetuam presenti scripto sigillum nostrum fecimus apponi Dat apud Stanleg xii kalendas Maii pontificatus nostri anno quinto Hiis testibus fratre Osberto abbate de Stanleg Adam archidiacono Cestr magistro Henrico de Wishawe officiali nostro magistro Radulpho de Lakock senescallo nostro Nicholao de Lega Walkelino et Willelmo capellanis nostris Iohanne de Sperham Willelmo de Burgton et Radulpho de Franketon clericis nostris et aliis