Charter Document - 05180236

Universis sancte matris ecclesie filiis ad quos presens scriptum pervenerit Rogerus Dei gratia Coventr et Lich episcopus salutem in Domino sempiternam Ad universitatis vestre notitiam volumus pervenire quod cum anno consecrationis nostre secundo ad manerium nostrum de Ichenton declinaremus invenimus ibidem dissensionem quandam inter dilectum in Cristo filium Thomam tunc Lich ecclesie precentorem ex una parte et parochianos suos homines nostros apud Gaydon manentes ex altera occasione cuiusdam cantarie quam ipsi homines habuisse et se habere debere dicebant in capella erecta apud Gaydon pro qua habenda date fuerunt antiquis temporibus matri ecclesie eorum de Chadleshunt ut proponebant sexaginta acre terre arabilis in campis de Geydon cum quadam parte prati et aliis pertinentiis suis quas nomine dicte ecclesie tunc possedit idem precentor Set super propositis nichil in scriptis exhibuerunt vel aliter docuerunt ipso precentore constanter asserente se ad ipsam cantariam nulla ratione teneri et adiciente terram predictam cum pertinentiis esse ius et dominium prefate ecclesie sue in cuius possessione steterat ipsa ecclesia a tempore cuius non exstabat memoria Nos autem auditis hinc inde propositis de consensu partium et capituli nostri Lich dissensionem predictam ordinando decrevimus sic sedare videlicet quod prenominata terra cum prato et aliis pertinentiis suis in iure et dominio matris ecclesie predicte ipsius precentoris et successorum suorum perpetuo permanente dabunt dicti homines apud Geydon manentes et inperpetuum mansuri eidem precentori et suis successoribus precentoribus Lich in auxilium ad sustentationem unius presbiteri in dicta capella celebraturi duas marcas annuas inperpetuum quas solvent apud Chadleshunte ipsi precentori et suis successoribus vel eorum procuratoribus ad terminos subscriptos scilicet ad festum sancti Michaelis dimidium marce ad festum sancti Andree apostolici dimidium marce ad festum Annuntiationis beate Marie dimidium marce et ad festum sancti Iohannis Baptiste dimidium marce et ad hoc fideliter et sine omni fraude faciendum se omnes pro tunc presentibus et futuris assensu unanimi et voto communi obligarunt Et idem precentor et sui successores eorum sumptibus invenient in dicta capella presbiterum perpetuo celebrantem salvis matri ecclesie de Chadeleshunte dicto precentori et eius successoribus decimis omnibus proventibus oblationibus obventionibus et omni subiectione et iure parochiali ita quod presbiter quem precentor qui pro tempore fuerit ad voluntatem suam posuerit ibidem nichil omnino de supradictis retinebit si erit contentus suis certis stipendiis sibi a precentore deputatis ut convenire poterit inter eos In solempnitatibus autem festis maioribus videlicet diebus omnium sanctorum Nativitatis Domini purificationis Assumptionis beate Marie Pasche Pentecoste et dedicationis ecclesie venient universi et singuli ad dictam matrem ecclesiam divina in ea reverenter audituri Et certis diebus quibus ex consuetudine ecclesiastica offerri debent offerent in eadem sicut boni faciunt cristiani in aliis ecclesiis vicinis Et in ipsis diebus cessabit dicta capella ab omni officio divino preter officium matutinale quod tempestive fieri debet ne perdant ipsi parochiani quod eisdem diebus sunt in matre ecclesia ulterius audituri et etiam percepturi et preter duas primas missas in die nativitatis Domini et primam missam in die Pasche ad quam communicabuntur minores et non potentes ad ecclesiam labo[rare] et reliqui omnes in matre ecclesia ut tenentur obedientie tamen gratiam poterit eis facere idem precentor ex causa cum viderit expedire Preterea ad fabricam matris ecclesie cimiterium claudendum et lumen contribuent ipsi sicut alii parochiani de Chadleshunt et panem benedictum dabunt cum secundum solitum cursum parochie ad eos devenerit et apud matrem ecclesiam humabuntur corpora decedentium purificabuntur mulieres et baptizabuntur parvuli exceptis casibus necessario expediendis Si autem cessaverint dicti homines in solutione predictarum duarum marcarum ad terminos statutos vel in aliis supradictis inventi fuerint transgressores cessabit ipsa capella ad mandatum precentoris quousque ipsi precentori tam super transgressoribus quam retentis arbitrio decani et capituli Lich satisfecerint competenter salva in omnibus aliis iurisdictione et dingnitate memorati precentoris quam secundum statuta et approbatas consuetudines Lich ecclesie in precentoria sua habere dinoscitur Ut autem predicta omnia perpetuis temporibus rata permaneant presenti scripto duplicato ut habeat precentor alterum et ipsi homines reliquum signum nostrum unacum signo memorati capituli nostri Lich et eiusdem Thome precentoris fecimus apponi Dat apud Sallowe die sanctorum Cosme et Damiani et pontificatus nostri anno tertio salvo etiam nobis et successoribus nostris iure pontificali et parochiali