Charter Document - 05180203

Universis sancte matris ecclesie filiis ad quos presens scriptum pervenerit Rogerus Dei gratia Coventr et Lich ecclesie minister humilis salutem in Domino sempiternam Ad universitatis vestre notitiam volumus pervenire quod inspectis et intellectis originalibus instrumentis predecessorum nostrorum Coventr et Lichesfeld episcoporum scilicet Ricardi Gerardi Willelmi Alexandri necnon et prioris et capituli Coventr decani et capituli Lich evidenter perpendimus ecclesias de Ylum Bromleg Abbatis Overa et de Stapenhull cum earum capellis ceterisque earum pertinentiis omnibus dilectis in Cristo filiis abbati et conventui Burt ab eisdem predecessoribus nostris canonice esse collatas et confirmatas et in proprios usus habendas tenendas et possidendas inperpetuum salvis vicariis in eisdem ecclesiis ad quas presentabunt dicti abbas et conventus cum eas vacare contigerit que consistunt in portionibus infrascriptis Vicaria ecclesie de Ylum ita est taxata quod vicarius omnes decimas minutas et obventiones altaris et decimam feni preterquam de Dominicis abbatis et conventus de Burt nomine vicarie percipit et unam marcam monasterio de Burt annuatim persolvit Solvit etiam synodalia consueta et eidem ecclesie per se vel per ydoneum capellanum et clericum debet deservire et unum mansum in villa de Ylum quod quidem fuit quondam Thome venatoris ad inhabitandum habebit Abbas vero et conventus de Burth percipiunt omnes decimas garbarum et habent totam terram pertinentem ad ecclesiam nec aliquid solvunt de minoribus decimis nec de decima feni Dominicorum suorum Percipiunt etiam omnes decimas et obventiones de capellis prefate ecclesie scilicet de Schon de Achover et de Caldon et eisdem capellis faciunt deservire preterquam de ecclesia de Blore de qua unam marcam annuatim et de ecclesia de Grendon quatuordecim solidos annuatim percipiunt et nichil oneris in eisdem sustinent Vicarius autem de dictis capellis nichil percipit nec aliquod onus sustinet in eisdem Memorati etiam abbas et conventus dicte ecclesie de Ylum cancellum debent reparare et parochiani navem ecclesie reparabunt et libros et calicem [] ornamenta invenient Abbas etiam et conventus archidiaconum loci procurabunt Habita quidem comparatione ad estimationem totius ecclesie valet vicaria quinque marcas Vicarius vero sua portione contentus est et abbas et conventus similiter Vicaria ecclesie de Bromleg Abbatis consistit in omnibus decimis minutis et obventionibus altaris exceptis abbati et conventui de Burt decimis agnorum lane et primo legato vivi averii Abbas autem et conventus de Burt habent totam terram pertinentem ad ecclesiam et percipiunt omnes decimas garbarum et decimam feni nec aliquid solvunt de minoribus decimis Dominicorum suorum et archidiaconum procurant Vicarius autem dicte ecclesie per se vel capellanum suum et clericum ydoneum dicte ecclesie honeste deserviet et synodalia persolvet et unum mesuagium iuxta cimiterium dicte ecclesie in quo capellani habitare solebant habebit Dicti vero abbas et conventus cancellum dicte ecclesie reparabunt Navem ecclesie parochiani perficient et libros et calicem [] ornamenta sustinebunt Habita quidem comparatione ad estimationem totius ecclesie valet vicaria centum solidos Vicarius vero sua portione contentus est et abbas et conventus similiter Vicaria ecclesie de Overa consistit in omnibus decimis minutis et obventionibus altaris quibuscumque preterquam in decima piscarie medietate decime feni et medietate decime molendinorum de Potlak et preter duas partes decimarum feni trium villarum scilicet de Magna Overa et Parva Overa et Finderna quas abbas et conventus Burt percipiunt et in octo bovatis terre quarum quatuor faciunt forinsecum servitium domini regis et quatuor sunt libere et solute ab omni exactione et tributo Item vicarius percipit tertiam partem decimarum garbarum totius parochie de Overa salvis dictis abbati et conventui decimis tam maioribus quam minoribus Dominicorum suorum Sustinet vero dictus vicarius qui pro tempore fuerit omnia onera ordinaria et tertiam partem extraordinariorum et solvit tres marcas annuatim ecclesie Burt scilicet unam medietatem in nativitate sancti Iohannis et aliam medietatem in festo sancti Martini Et si placuerit abbati procurabit eum semel in anno apud Overam moderate tamen secundum facultates suas Vicarius quidem deserviet ecclesie de Overa cum capellis suis per se et capellanos suos et ydoneos clericos Habita quidem comparatione ad estimationem totius ecclesie valet vicaria sex marcas Vicarius vero sua portione contentus est et abbas et conventus similiter Vicaria ecclesie de Stapenhull consistit in omnibus decimis minutis et obventionibus altaris quibuscumque totius parochie et in decima feni excepto feno dominicorum dictorum abbatis et conventus in tribus acris terre arabilis in campis de Stapenhull et una virgata terre in campo de Stanton cum messuagio de eadem parochia Dicti vero abbas et conventus percipiunt omnes decimas garbarum nec aliquid solvunt de minoribus decimis Dominicorum suorum Vicarius autem habet quoddam mansum in villa de Stapenhull Abbas siquidem debet reparare cancellum ecclesie de Stapenhull et parochiani navem ecclesie reparabunt et libros et calicem [] ornamenta invenient Et vicarius faciet deserviri ecclesie per se vel capellanum suum et clericum ydoneum et omnia onera ordinaria sustinebit Preterea vicarius habet duas virgatas terre cum prato et duobus mansis in villa de Drakelowe et duas virgatas terre cum pertinentiis in campis de Stanton que quatuor virgate prefate vix valent per annum viginti solidos Parochiani vero de Drakelowe et de Caldewalle et de Nova Aula petunt duos capellanos pro predicta terra Vicarius quidem sua portione contentus est et abbas et conventus similiter Ista omnia supradicta a vicario percepta annuatim valent quatuor marcas viginti solidis suprascriptis infra quatuor marcas annumeratis Nos vero honestatem ac religionem dictorum abbatis et conventus et devotionem quam erga nos et ecclesiam nostram gerunt attendentes predecessorum nostrorum vestigiis inherendo prefatarum ecclesiarum cum earum capellis et pertinentiis omnibus collationes et confirmationes prefatis abbati et conventui factas taxationes insuper et ordinationes dictarum vicariarum prout premissum est ratas habentes et gratas easdem pontificali auctoritate confirmamus et presentis scripti patrocinio communimus In cuius rei testimonium presenti scripto sigillum nostrum apponi fecimus Dat apud Brewode die sanctorum innocentium anno Domini millesimo ducentesimo quinquagesimo quinto