Charter Document - 05180189
| Charter Number: | 05180189 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Dispute |
| Date: | 1241 |
| Date type: | Internal, Episcopal, Feast |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Hugo miseratione divina Coventr et Lich ecclesiarum minister humilis salutem in Domino sempiternam Ad universitatis vestre notitiam volumus pervenire quod cum contentio mota fuisset inter Iohannem de Brecham et Walterum de Kayam presbiteros diversis temporibus ad vicariam ecclesie de Esschebourn presentatos iidem tandem post diutinas altercationes inter ipsos habitas de voluntate et assensu decani Lincoln se nostre ordinationi absolute in omnibus subiecerunt iurantes in verbo Domini inspectis evangeliis quod gratanter acceptarent quicquid nos in predicto negotio duceremus inter ipsos ordinare Nos autem de consilio capituli nostri Lich rata manente ordinatione auctoritate nostra facta per decanum Lich et precentorem Lincoln de quinquaginta marcis memorato decano Lincoln annuatim de eadem ecclesia nomine pensionis solvendis in nomine Domini ordinamus ut predictus Iohannes ecclesiam predictam cum cura animarum nomine perpetue vicarie obineat predictas quinquaginta marcas solvendo et omnia alia onera eiusdem ecclesie ordinaria et extraordinaria plenarie sustinendo Habito etiam respectu ad ius quod prefatus Walterus in eadem vicaria obtinuit quod gratis in manus nostras resignavit ordinamus eidem Waltero xxx marcas de eadem ecclesia annuatim nomine simplicis beneficii percipiendas per manus vicarii qui pro tempore fuerit ibidem medietatem scilicet ad festum beati Michaelis et aliam medietatem ad Pascham apud Esseburn ita quod quotienscunque cessatum fuerit in solutione predictarum xxx marcarum terminis statutis solvat cessans tres marcas nomine pene predicto Waltero una cum principali debito rata nichilominus manente ordinatione salvis nobis et successoribus nostris in sepedicta ecclesia iure pontificali et parochiali et sacrosanctis ecclesiis Coventr et Lich debita obedientia et reverentia Ut autem hec ordinatio perpetue firmitatis robur optineat eam presentis scripti pagina et sigilli nostri testimonio roboravimus Dat apud Stok in crastino octabarum apostolorum Petri et Pauli pontificatus nostri anno secundo