Charter Document - 05180176
| Charter Number: | 05180176 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1224 |
| Date type: | Assigned |
| Resource Link(s): |
|
Charter:
Omnibus Cristi fidelibus Egidius decanus de Wolfronhampton et eiusdem ecclesie canonici salutem in Domino Noverit universitas vestra quod cum venerabilis pater A Dei gratia Coventr et Lich episcopus nos lege diocesana per litteras domini pape super obedientia sibi impendenda convenisset ita amicabiliter inter nos composuimus videlicet quod dictus episcopus ista nomine ecclesie sue percipiet canonicam scilicet obedientiam a decano nostro qui liberam in ecclesia sua de Wolfronhampton more consueto conferendi prebendas retineat potestatem et instituendi et corrigendi excessus clericorum suorum nisi post canonicam ammonitionem ab episcopo factam deses fuerit repertus ut tunc ad ipsum corrigendi eosdem excessus devolvatur potestas aliter autem non omni exactione pecuniaria et procuratione exclusa exceptis duobus solidis nomine denariorum beati Petri eidem a dicta ecclesia singulis annis solvendis et exceptis causis matrimonialibus omnibus eiusdem parochie et sacrilegiis et arduis causis que merito sunt ad episcopum referende et exceptis aliis causis de parochia de Wolfronhampton per appellationem legitimam ad episcopum devolutis Episcopus autem pro voluntate sua in ecclesia nostra officium celebrandi predicandi confirmandi et publicas penitentias iniungendi cum debita veneratione excercebit crisma et oleum debito modo nobis impertiendo Ordinandos ab ecclesia nostra quibus nichil canonicum obstiterit dummodo indempnitati sue et ecclesie sue provideatur cum a nobis fuerit requisitus benigne admittet processione pentecostali more consueto eidem reservata Nos autem ipsum in adventu suo primo post consecrationem suam et de partibus transmarinis cum debita veneratione et processione sicut vicine ecclesie admittemus Ipse autem ecclesiam nostram et eius iura et possessiones pro officii sui debito secundum deum tuebitur nobis et clericis nostris omni iniuria et rancore remisso In cuius rei testimonium presentem paginam signis decani nostri et capituli duximus roborandam Valete