Charter Document - 05180071

Omnibus Cristi fidelibus presens scriptum inspecturis vel audituris Alexander Dei gratia Conventr et Lichisfeld episcopus salutem in Domino Ex iniuncto nobis cure pastoralis officio universis quos officii nostri cura contingit paterna tenemur sollicitudine providere precipue tamen illos fovere tenemur caritatis amplexu quos et paupertas premit et religionis honestas Deo reddit acceptos Hinc est quod nos ad presentationem dilectorum in Cristo filiorum Hugonis dicti prioris de Erdbury et Radulfi de Suleya militis admisimus dilectum filium nostrum Enoc sacerdotem ad vicariam ecclesie Omnium Sanctorum de Derced Maiori quam vicariam de communi assensu predictorum Hugonis dicti prioris de Erdbury et Radulfi de Suleya militis sic taxavimus et ordinavimus videlicet quod dictus Enoc et vicarius qui pro tempore fuerit habeant totum altaragium prefate ecclesie cum pertinentiis suis insuper et decimas garbarum octo virgatarum terre in villa de Radeweya et decimas garbarum duarum carrucatarum terre in villa de Derced de dominico prioris antedicti et decimam dimidie virgate terre quam Aluredus homo dicti prioris tenebat tempore confectionis presentis instrumenti et decimam octo acrarum quas cottarii dicti prioris eo tempore tenebant et medietatem decimarum feni magni prati de dominico dicti Radulfi et omnes alias decimas feni sine diminutione Habeat etiam vicarius domos que site sunt in dominico ecclesie preter horreum et boveriam secundum divisionem muri quem precepimus ibidem fieri ad divisionem arearum prioris et vicarii Erit autem idem vicarius sacerdos et non minoris ordinis et presentabitur nobis vel successoribus nostris de communi assensu prioris et dicti Radulfi vel heredum suorum qui pro tempore fuerint prioris scilicet tamquam rectoris ecclesie et Radulfi vel heredum suorum tamquam patroni quod si forte presentaverint alium quam sacerdotem ydoneum eo ipso sint ea vice presentandi iure privati in posterum tamen ipsis priore iure servato salvo etiam nobis et successoribus nostris per omnia iure pontificali et parochiali Habebit autem idem vicarius alium socium capellanum honestum perpetuo et diaconum qui cum ipso deserviat ecclesie memorate Sustinebit etiam idem vicarius omnia honera ecclesie debita et consueta Preterquam si forte cancellum fuerit reparandum vel libri ex toto defuerint ad hec conferent prior et vicarius pro portionibus ipsos contingentibus Ut autem hec nostra taxatio et ordinatio stabiles perpetuo et inconcusse perseverent eas sigilli nostri munimine duximus roborandas Act anno gratie MCCXXXII mense Maii Hiis testibus magistro Willelmo de Mammecestre decano Lichisfeld magistro Ricardo de Glouvernia thesaurario Lichisfeld Willelmo quondam abbate de Stanleya Radulfo de Suleya patrono dicte ecclesie Iohanne Russel milite Hugone rectore ecclesie de Avenederced Ricardo sacerdote de Cobintona Henrico fratre suo magistro Simone Perduz magistro Alexandro Blundo Nigello filio Simonis Radulfo filio Mabilie Philippo Blundo et multis aliis