Charter Document - 05180066
| Charter Number: | 05180066 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1215 - 1223 |
| Date type: | Assigned |
| Resource Link(s): |
|
Charter:
Universis Cristi fidelibus ad quos presentes littere pervenerint W miseratione divina Covintr ecclesie minister humilis eternam in Domino salutem Honestatem et religionem karissimorum in Cristo filiorum prioris et conventus Wigorn attendentes et eorundem necessitati ac indigentie paterna pietate compatientes quanto ipsos et domum suam affectione maiori diligimus et caritate tanto ipsorum insufficientiam cura propensiori et sollicitudine vellemus relevare Hinc est quod ecclesiam de Bromwich cum omnibus ad eandem pertinentibus memoratis priori et conventui divine caritatis intuitu et pro anima pie recordationis I quondam regis Angl eisdem ad hospitalitatis sustentationem et infirmorum in proprios usus perpetuo possidendam contulimus et hac presenti carta nostra confirmavimus ipsosque in corporalem dicte ecclesie possessionem induci fecimus salvo nobis et successoribus nostris iure pontificali et parrochiali Ut autem hec nostra collatio et confirmatio rata et inconcussa perpetuo perseveret eam presentis scripti auctoritate et sigilli mei munimine roboravimus Hiis testibus magistro R de Bosco archidiacono Covintr magistro R de Maydenestan archidiacono Cestr magistro Alexandro archidiacono Salopesbyr magistro Zacaria Willelmo de Hatfeld Gervasio de London et aliis