Charter Document - 05180004
| Charter Number: | 05180004 |
|---|---|
| Cartulary Title: | Coventry and Lichfield 1215-1256 Volume 43 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1215 - 1223 |
| Date type: | Assigned |
| Resource Link(s): |
|
Charter:
Willelmus Dei gratia Covintr ecclesie humilis minister omnibus ad quos presens scriptum pervenerit salutem in Domino Ex officio nobis commisso loca religiosa paterna pietate fovere tenemur et promovere et eis uberius providere quos in Dei servitio vigilantiores noverimus ut dum eis in temporalibus providetur uberius et libentius divinis vacent obsequiis sicque Deo militent ut necesse non habeant secularibus implicari negotiis Eapropter attendentes religionem et honestatem dilectorum filiorum nostrorum prioris et canonicorum de Burgescho et inmoderatam eorundem paupertatem in Domino miserantes eis ecclesiam de Ormeschirche cum pertinentiis suis scilicet tam duas partes quas possident quam tertiam portionem pro tempore vacaturam ad eorum sustentationem in proprios usus concedimus habendas salva tamen competenti vicaria ad quam cum vacaverit idoneum vicarium nobis et successoribus nostris presentabunt qui honera eiusdem ecclesie sustinebit et eis de temporalibus nobis autem et successoribus nostris de spiritualibus respondebit Ut hec igitur nostra concessio firmitatis vigorem optineat inposterum eam presenti scripto et sigilli nostri appositione roboravimus Magistro Iohanne Blundo magistro Nicholao de Weston domino Roberto capellano magistro Rannulfo Sansone Gibel magistro Alano de Tawell Ricardo de Stanedis Galfrido decano de Walleg testibus et multis aliis