Charter Document - 05172058

Vos autem sicut nobis vestris litteris intimastis in omnibus nostris iussionibus obedire parati cum Glaston[iam] venissetis constitutis in presencia vestra procuratoribus et officiali episcopi et conventu Glaston[iensi] postulaverunt nostri execucionem mandati Pars episcopi non ut litem iudiciumque subiret set ut verba faceret pro episcopo absente ad elidendam monachorum intencionem proposuit divisionem possessionum et reddituum Glaston[iensis] ecclesie inter prefatos episcopum et conventum in curia karissimi filii nostri Ioh[annis] regis Anglorum illustris in ipsius et quorundam magnatum suorum presencia factam fuisse antequam tenor mandati nostri ad episcopum vel suos eciam pervenisset Quibusdam monachis hoc procurantibus et consencientibus nomine conventus eiusdem eo videlicet qui prior ecclesie dicitur et alio qui subpriorem se gerit medario eciam camerario et cantore cum litteris conventus de rato patentibus ipsi regi ab eisdem porrectis Quod eciam idem rex per suas ad nos directas litteras est testatus prohibens ne statueretis aliquid contra particionem factam in presencia sua de consensu parcium ut aiebat Protestabatur enim hoc fore contra dingnitatem regiam et honorem si retractaretis quod auctoritate sua fuerat terminatum presertim cum diceret suam esse possessionem eiusdem ecclesie baroniam quoniam monasterium Glaston[iense] tenetur ei ad servicium quadraginta militum exhibendum quod idem monachi minime diffitentur Adiecit eciam pars episcopi prefatos monachos conventus nomine destinatos se observaturos ordinacionem illam coram rege factam fide interposita promisisse Set requisiti monachi utrum ita esset ut pars episcopi proponebat dicti prior subprior et medarius se consensisse ac consentire in ordinacionem illam predictam et se fidem prestitisse simpliciter et absolute dixerunt de ipsa ordinacione servanda Camerarius autem et cantor se fidem dedisse de ordinacione illa servanda sub ea condicione dixerunt si conventui foret accepta Sacrista vero et quidam alius monachus dicebant se consentire in ordinacionem illam et eam ratam habere Reliqui vero monachi omnes se non consensisse nec consentire in ordinacionem illam nec de ipsorum consciencia et consensu predictas litteras de rato super ordinacione facienda coram rege fuisse transmissas sunt unanimiter protestati proponentes se contra illam particionem ad sedem apostolicam appellasse Ex parte vero episcopi fuit propositum coram nobis quod cum sigillum Glaston[iensis] ecclesie fuisset in quorundam custodia monachorum quos ad hoc episcopus deputarat et sub sigillo procuratoris ipsius eiusdem amoto sigillo et fracto scrinio in quo repositum fuerat sigillum ecclesie in aliorum monachorum custodiam est translatum Quare timebant ne aliquid in dispendium eiusdem ecclesie tunc temporis fuerit eodem sigillo signatum vos autem invenientes sigillum ipsum sub alia custodia quam prius per disposicionem episcopi fuerat de partis utriusque consensu illud salvo custodiri fecistis irrita scripta censentes si qua tempore medio inter custodiam eiusdem sigilli ab episcopo ordinatam et vestram in damnum eiusdem ecclesie vel in preiudicium iuris episcopi seu conventus confecta fuerunt Super illo vero qui prior eiusdem ecclesie dicitur vobis occurrit articulus quiddam in se difficultatis continens quemadmodum videbatur hiis qui erant ex parte episcopi asserentibus ipsum fuisse priorem ab episcopo canonice constitutum et de consensu conventus Ad hoc autem in continenti probandum se prior ipse dicebat esse paratum maiore parte conventus in contrarium protestante se numquam in eum tamquam priorem spontanee consensisse et lite pendente inter episcopum et W[illelmum] Picam prefatum monachum prioratum ab episcopo recepisse Tenor quoque mandati nostri huius articuli difficultatem adauxerat ex quo vobis posse conici videbatur id nos sensisse ut facta ordinacione ipsius ecclesie iuxta mandatum nostrum prior secundum consuetudinem aliarum cathedralium ecclesiarum Anglie que monachos habent constitueretur ibidem unde determinacioni nostre questionem huiusmodi dimisistis Monachorum vero procuratore sicut mandaveramus admisso quoniam episcopus absens erat et pro necessariis quibusdam rengni negociis ad nos profectus quemadmodum dicebatur super hiis que inquirenda vobis iniuncximus veritatem diligencius inquirentes eam nobis intimare curastis Super eisdem vero nos cerciores reddere curassetis nisi possessionum Glaston[iensis] ecclesie incole quos vocaveratis ad presenciam vestram ut per eos possessionum earumdem reddituum et onerum vera vobis estimacio innotesceret a ministris regiis sub interminacione carceralis pene deterriti ad vos accedere formidassent Inquirentes itaque de antiquo et consueto numero monachorum accepistis a senioribus eiusdem monasterii se vidisse aliquando septuaginta duos et non plures monachos in conventu et a maioribus suis audisse quod octoginta et amplius ibidem erant antiquitus constituti Set ab illo antiquo tempore multa que tunc habebat monasterium per alienacionem et alio modo subtracta sunt usibus monachorum in quorum ministeriis invenistis viginti tres servientes hereditario iure ad officia constitutos et hii necessarii videbantur Alios autem reperistis circiter octoginta sub temporalibus stipendiis monachorum ad diversos ipsorum usus commodos ac necessarios ut asserunt deputatos De facultatibus vero monasterii sicut intelligere potuistis providus paterfamilias cura diligenti adhibita et cultura perciperet circiter octingentas libras annuas sterlingorum Indagentes eciam sicut mandaveramus institucionem cathedralium ecclesiarum Angl[i]e que monachos habent in quibus honestius vivitur et laudabilius ordo monasticus observatur et plenius vacatur operibus caritatis invenistis porciones monachorum ab episcoporum porcionibus separatas et in quibusdam illarum unicum est et commune marsupium constitutum in quod omnes redditus et quecumque ex obvencionibus proveniunt conferuntur ex quo ad omnes usus monasterii hospitum et pauperum communiter et sub fideli custodia ministratur In aliis vero separatas porciones habent et marsupia sacrista cellerarius camerarius et elemosinarius ad sua ministeria peragenda Generaliter autem prior constituitur ab episcopo cum monachorum assensu et in plerisque prefato modo constituuntur ab episcopo quatuor officiales predicti Sane in fine litterarum vestrarum prout iniunctum fuerat vobis frater episcope et fili abbas vestrum consilium intimastis quod videlicet iuxta illius ecclesie condicionem presentem vobis sufficere videbatur ut in conventu ex ordine sexaginta monachi residerent ad quorum usus omnes tam interiores quam exteriores sustentacionem pauperum et recepcionem hospitum honeste ac plenarie faciendam ad fabricam ecclesie restaurandam et sustinendas et emendandas operaciones officinarum et aliarum domorum cum altaris oblationibus sufficerent facultates et redditus librarum sterlingorum circiter sexcentarum arbitrio boni viri et estimatione communi taxati