Charter Document - 05170222

Omnibus Cristi fidelibus presentes litteras inspecturis Hugo Dei gratia episcopus Elyensis salutem in Domino Quoniam ut ait apostolus omnes stabimus ante tribunal Ihesu Cristi recepturi prout corpore gessimus sive bonum fuerit sive malum oportet nos diem messionis extreme operibus misericordie prevenire ac eternorum intuitu seminare in terris quod reddente Domino cum multiplicato fructu recolligere debeamus in celis firmam spem fidutiamque tenentes quoniam qui parce seminat parce et metet et qui seminat in benedictionibus de benedictionibus et metet vitam eternam Cum igitur elemosine cultus inter alia caritatis opera debeat non inmerito computari universitatem vestram duximus in Domino commonendam in remissionem peccatorum iniungentes quatinus de bonis vobis a Deo collatis ad edificationem domus elemosinarie pauperum iuxta ecclesiam beati Ethelb[er]ti Hereford site et a dilectis nobis in Cristo decano et capitulo et Elya de Bristoll canonico Hereford in domibus que fuerunt Steph[ani] filii Hugon[is] constructe ad sustentationem pauperum causa elemosine illuc divertentium aliqua caritatis subsidia misericorditer erogetis ut per hec et alia bona que Domino inspirante feceritis eterna possitis gaudia promereri Nos autem de Dei misericordia et beate virginis et omnium sanctorum meritis confidentes omnibus parochianis nostris de aliis universis quorum diocesani hanc nostram ratam habuerint indulgentiam qui ad edificacionem prefate domus et ad sustentationem pauperum ad eandem confluentium pias elemosinas duxerint conferendas si de peccatis suis vere contriti fuerint et confessi de iniuncta penitentia quindecim dies misericorditer relaxamus Prohibentes etiam ne auctoritate litterarum istarum habeant occasionem predicandi Valeatis semper in Domino