Charter Document - 05170190
| Charter Number: | 05170190 |
|---|---|
| Cartulary Title: | Ely 1198-1256 Volume 42 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1235 |
| Date type: | Internal, A.D. |
| Resource Link(s): |
|
Charter:
Omnibus hoc scriptum visuris vel audituris H[ugo] Dei gratia Eliensis episcopus salutem in Domino Inter preclaros Cristi confessores quorum presentia corporalis Anglicane patrocinatur ecclesie beatus Cuthbertus non mediocre sanctitatis preconium dinoscitur optinere Nec immerito laudibus humanis attollitur cuius meritis infirmi sanitatis gratiam consequuntur Cuius caro carie carens et prorsus integre perseverans dormientem potius quam mortuum representare videtur Membra namque beati viri manere penitus incorrupta non solum venerabilis Bede presbiteri scriptura testatur verum etiam probavit ipsius sanctissimi corporis translatio sub hoc novissimo tempore celebrata Hic itaque thesaurus super aurum et topazion preciosus apud Dunelmensem requiescit ecclesiam ubi supra sacrum illius sepulchrum devocio veterum lapideas erexit testudines que iam nunc plene fissuris et rimis dissolutionem sui indicant imminere adeoque propinquam minatur ruinam ut quicumque molem illam tam suspecte pendentem aspexerit veraciter dicere possit quoniam terribilis et tremendus est locus ille Cum autem venerabilis frater dominus R[icardus] Dunelmensis episcopus tam manifesto desiderans obviare periculo disponat auxiliante domino apud orientalem supradicte ecclesie partem novum opus extruere in quo ipsius sancti confessoris corpus valeat tutius pariter et honestius collocari universitatem vestram monemus et hortamur in Domino ut ad prefati operis fabricam celerius consummandam de bonis vobis a Deo collatis aliqua caritatis subsidia velitis misericorditer erogare quatenus per hec et alia bona que feceritis eterna possistis gaudia promereri Nos vero de Dei misericordia et de gloriose virginis necnon et sancti Cuthberti omniumque sanctorum meritis confidentes omnibus qui fabrice memorate pias elemosinarum largitiones impenderint seu predictum locum per hoc septennium proxime futurum causa orationis adierint et quorum diocesani hanc indulgentiam nostram ratam habuerint si de peccatis suis vero contriti fuerint et confessi triginta dies de iniuncta sibi penitentia relaxamus Data London anno gratie millesimo ducentesimo tricesimo quinto septimo id Iulii