Charter Document - 05170180

Universis Cristi fidelibus presentes litteras inspecturis vel audituris H[ugo] Dei gratia Elyen[sis] episcopus salutem in Domino sempiternam Cum Rex pacificus nos instruat suis disciplinis ut litibus imponentes silencium seminales iurgiorum causas radicitus evellere studeamus ne posteritati vestre contendendi relinquamus materiam que subsequuntur in scriptum redegimus ad cautelam Volentes ut universis quorumlibet fidelium auribus innotescat quod cum dominus Ric[ardus] magister et fratres hospitalis sancti Ioh[ann]is evangeliste Cantebr anno gratie MCCXLIX super quampluribus reddituum serviciorum et consuetudinum articulis sibi debitis de possessione quadam in villa de Newha[m] quam Michael Malherbe fratribus contulerat de Carmelo satisfactionem competentem peterent ab eisdem et eciam cautionem quod per eorum inhabitacionem ecclesie sancti Petri extra portam de Trumpiton circa spiritualia nulla inposterum inferretur iniuria et eciam quod absque predictorum magistri et fratrum hospitalis assensu non liceret dictis de Carmelo fratribus dictam possessionem suam de feodo hospitalis processu temporis ampliare tandem dicti fratres de Carmelo pro redditibus serviciis et consuetudinibus ad dictam possessionem spectantibus predictis magistro et fratribus hospitalis viginti solidos sterlingorum solverunt et cautionem petitam prestiterunt prout viros decet religiosos fideliter promittentes quod quamdiu ibidem inhabitaverint nunquam aliquod annale vel tricennale aut oblaciones vel obvenciones iure parochiali ad dictam ecclesiam beati Petri spectantes ab eisdem ecclesie parochianis recipient nec aliquod sacramentum eisdem parrochianis sanis vel infirmis ecclesiasticum ministrabunt nisi urgente necessitate inevitabili vel de licentia eiusdem ecclesie speciali nec in hiis aut aliquibus aliis umquam scienter aut prudenter eidem ecclesie iniuriam inferent neque dampnum Concesserunt eciam magister et fratres dicti hospitalis predictis fratribus de Carmelo predictam possessionem suam ampliare requisito tamen prius consensu dictorum magistri et fratrum dicti hospitalis et eis satisfacto saltim per ordinationem nostram vel nostri officialis seu archidiaconi loci vel eiusdem officialis quem eorum utraque pars duxerit eligendum vel per duos eorum si per unum satisfactio expediri non possit Ita quod si utraque pars in unum vel duos communiter noluerit consentire unus ex una parte et alter eorum ex altera eligatur ita quod infra quadraginta dies satisfactio si fieri possit expediatur Sin autem ne in nimium fratrum Carmeli dispendium huius executio [negocii] cum evenerit differatur elapsis quadraginta diebus post requisitionem consensus dictorum magistri et fratrum hospitalis factam liceat dictis fratribus de Carmelo possessione et usu ampliationis tunc adquisite deinceps sine omni perturbatione gaudere ita tamen quod dictis magistro et fratribus hospitalis deinde sub forma prescripta competenter nichilominus satisfiat Dicti etiam magister et fratres hospitalis inhabitationi fratrum Carmeli predictorum in area pretaxata et divinorum celebrationi et omnibus ceteris eorum bonis habitis et habendis tam spiritualibus quam temporalibus sub forma prescripta benigne et amicabiliter adquieverunt eandem aream pretaxatam tam liberam esse concedentes eisdem quod eos pro ipsa preterquam in illis que in scripto continentur presenti in nulla ulteriori exactione vexatione vel calumpnia de cetero coartabunt Et tam dicti magister et fratres dicti hospitalis quam predicti fratres de Carmelo quantum ad predicta iurisdictioni nostre et archidiaconi Elyen[sis] specialiter se subiecerunt ut alter nostrum partem utramque et maxime renitentem legittima premonitione facta per censuram ecclesiasticam cum opus fuerit possit compellere ad omnia supradicta fideliter observanda que omnia partes predicte inviolabiliter servanda fideliter promiserunt In huius rei memoriam particulis huius scripti cyrograffati sigillum nostrum apposuimus partibus predictis sigilla sua alternatim apponentibus Dat anno gratie MCC quadragesimo nono