Charter Document - 05170178

Reverendo in Cristo patri et domino H[ugoni] divina providentia Elyen[si] episcopo Alexand[er] officialis archidiaconi sui cum scincera reverentia et devotione salutem Noverit sancta paternitas vestra me iuxta mandatum vestrum diligentem fecisse inquisicionem super statu ecclesie beati Petri extra portam de Tru[m]piton prout ut subsequentibus liquido poterit perpendi Per istos facta est inquisicio super statu ecclesie beati Petri extra portam de Tru[m]piton scilicet Petr[um] vicarium eiusdem ecclesie et Petr[um] de Neunham capellanum ecclesie omnium sanctorum Nich[olau]m vicarium ecclesie sancti Edwardi Ioh[ann]em capellanum de sancto Andrea Herveyum Gogging clericum Rad[ulfum] Wombe Ric[ardum] filium Yvonis Herveyum le Meyre Rob[er]tu[m] Seman et Galfridu[m] Potekyne qui omnes iurati constanter dicunt et affirmant quod ecclesia sancti Petri extra portam de Tru[m]piton non vacat hanc reddentes rationem quod hospitale sancti Ioh[ann]is possidet eam et possedit tam triginta annis elapsis continue ex collatione bone memorie Eustachii tunc Elyen[sis] episcopi et penes idem hospitale est ius patronatus ex collatione Henr[ici] filii Sigari qui eidem hospitali contulit ius presentandi Dicunt etiam quod aliquando fuit contentio super iure patronatus eiusdem ecclesie in curia domini regis inter ipsum hospitale ex una parte et Herb[er]tu[m] capellanum de sancto Mich[ael]e ex alia item inter Reginaldu[m] filium Aluredi patrem ipsius Ioh[ann]is qui modo presentavit ex tercia parte et Yvone[m] Pipestran ex quarta et Will[elmu]m de Kaldecote ex quinta et tunc dirationavit hospitale ius patronatus per assisam et iuratores erant illa assisa Herv[eus] Gogging et Rob[ertus] Seman preiurati et postea recepto mandato domini regis quod idem hospitale ius patronatus dirationaverat concessit idem episcopus dicto hospitali prefatam ecclesiam in proprios usus Ad hec dicunt non esse contentionem super personatu vel vicaria et hec vestre sancte paternitati significo Acta anno Domini MCCXXXV mense Februarii