Charter Document - 05170024
| Charter Number: | 05170024 |
|---|---|
| Cartulary Title: | Ely 1198-1256 Volume 42 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1200 |
| Date type: | Assigned |
| Resource Link(s): |
|
Charter:
Sanctissimo patri ac domino reverendissimo I[nnocentio] Dei gratia summo pontifici E[ustachius] divina miseratione Elien[sis] episcopus S[amson] eadem permissione dictus abbas sancti Edmundi et R[ogerus] decanus Lincolnien[sis] salutem et tam spontaneum quam debitum devotionis omnimode famulatum Cum causa inter venerabilem patrem archiepiscopum et priorem et monachos Cantuarien[ses] super capella de Lameia edificanda vel non exeniis etiam et quibusdam aliis felicis memorie H[ugone] felicis memorie Lincolnien[si] episcopo necnon et mihi Elien[si] ecclesie ministro humili et mihi abbati sancti Edmundi a vestra sanctitate commissa fuisset in ipsa fuit cum omni diligentia ac devotione cum multorum discretorum virorum deliberatione consilii quatenus decuit iuxta mandatum vestre sublimitatis processum Tandem vero post multas utriusque partis rationes et allegationes prefati archiepiscopi et monachi in nos tres super predictis omnibus que in contentionem venerant compromittere decreverunt Nos vero perpetuam pacem ac tranquillitatem Cantuarien[sis] ecclesie estuanti desiderantes affectu Dei timore per oculis habito prout melius scivimus ac potuimus sicut in tenore scripti nostri quod vestre paternitati transmittimus continetur sumus super hiis que premisimus diligentius arbitrati clementie vestre devotissime supplicantes quatinus si placet secundum quod vestre circumspectionis prudentia viderit expedire predictum arbitrium ad sedandam discordiam et pacem perpetuam observandam dignemini confirmare Conservet vos dominus ecclesie sue sancte per tempora longa