Charter Document - 05160027

Omnibus Christi fidelibus Guido Verduni salutem et stabilem in Domino pacem Quoniam sepius contingit beneficia nobilium liberalitate ad remedium animarum ipsorum monasteriis iuste et fideliter impensa pravis perversorum hominum consiliis auferri vel imminui iccirco tam futuris quam presentibus notifico carta presenti et ut semper ratum sit sigilli mei impressione confirmo quod pro remedio anime mee et omnium antecessorum meorum ego Guido Verduni laudavi et concessi libere bona fide et pace Deo et Sancte Marie de Maceriis et monachis eiusdem loci totum territorium Scoterie quod Falco de Rehum a me in casamento tenebat Concessi quoque cetera casamenta mea que adquisierint sine ville destructione Dedi etiam eis omnem usuariam per totam terram meam in bosco et in plano ad materiandum scilicet et ad pastionem porcorum postquam alii porci aderunt et ad nutrimentum ceterorum pecorum Pedagia quoque et censum tam in foris et nundinis meis quam in transitu et in aquis de propriis rebus ipsorum dedi eis et piscationem per omnes aquas meas cum retibus et omnibus ingeniis et ad generale capitulum etiam in defensis meis Concessi quoque eis de retibus Vorgiaci censum quem Hicmarus patruus meus eis dederat et terram de Racinosa et de Flix quam frater meus Hugo moriens eis dimiserat et stannum Sancti Boneti et pratum iuxta illud et ibidem emi eis de nummis meis septem libratas terre Duo insuper loca ad bennas edificandas dedi eis in Sagonna unum videlicet ad populetum et alium ad conam Hec omnia laudavi et confirmavi in presentia et in manu Willelmi secundi abbatis de Maceriis in capitulo eiusdem loci Huius rei testes Johannes capellanus noster de Verduno Hicmarus de Rocha Willelmus de Archis monacus Moyses et Petrus et multi alii Postea vero in manu Wichardi abbatis quando idem abbas dedit breviarium unum capelle nostre de Verduno donavi prefatis monachis alium locum ad bennam edificandam ad lavatorium scilicet Illiriaci Huius rei testes sunt hii Filibertus capellanus noster de Verduno Durannus maior Moyses et Lebaudus monachi Rainaudus Aschiricus monacus Johannes conversus famulus predicti abbatis Wichardi Sciendum quoque quod census meos de retibus ubicumque in aqua mersa fuerint predicte abbatie pro XI libris pignori supposueram et postea in infirmitate mea sine ulla retentione eidem abbatie predictos census pro anima mea et antecessorum meorum ex toto devotus dedi et in perpetuum concessi Huius rei testes sunt hi Bernardus frater meus archidiaconus Kabilonensis Fromundus clericus Kabilonensis Filibertus capellanus noster Guido cellararius Garnerius Alamannus