Charter Document - 05160016

In nomine sancte et individue trinitatis ego Guido abbas Arremarensis notum sit posteritati nostre quod discordia erat inter me et Willermum abbatem de Maseriis pro eo quod abbas de Maseriis habebat grangiam unam in parrochia de Saviniaco de qua ecclesie nostre decimas reddere nolebat cum Saviniacensis ecclesia cum decimis et pertinentiis suis propria sit ecclesie Arremarensis Tandem querela que inter utramque ecclesiam erat hoc fine perducta est ad pacem et concordiam Statutum est ut ecclesia de Maseriis per singulos annos persolvat ecclesie Arremarensis in festivitate beati Michaelis septem sextarios annone et medietas sit de frumento et alia medietas vel de ordeo vel de avena sicut nascetur in terra Quod si ecclesia de Maseriis aliquas terras amplius adquirere poterit in omni decimatione ecclesie Saviniacensis et ecclesie de Bez sub hoc pacto erit ut nichil amplius quam quod predictum est persolvat Et si iterum aliquando alibi congruam commutationem ecclesie Arremarensis dare potuerit accipiet eam Hoc etiam adiunctum est ut si forte terre quas ecclesia de Maseriis vel adquisiunt vel adquisierit in alienas manus redierint ecclesia Arremarensis decimas habebit Et ne hoc aliqua temporum vetustate vel pravorum hominum perversitate vel mutaretur vel deperiret utriusque abbatis sigillo et assensu capituli utriusque munitum est et confirmatum Huic concordie interfuerunt Radulfus archidiaconus Eduensis et Belnensis decanus Gilo archipresbiter Rainaldus de Pomar vicarius Constantinus de Biliniaco Johannes de Saviniaco presbiteri magister Rainaldus Robertus senescalcus Galterius Gifardus canonici Ismereus de Savini et Arnulfus nepos eius Henricus Amorous Petrus prior Buxerie De Maseriis Wicardus prior Benedictus cellerarius Willermus de Archis monachi Arremarenses Burdinus prepositus magister Nicholaus Jacobus monach[i] Aldo cellerarius Cistercii Actum Belne in claustro canonicorum anno Incarnationis Domini MCLVIII mense februarii