Charter Document - 05150113

Omnibvs Christi fidelibus presens scriptum visuris vel audituris Robertus de Campaniis Salutem in domino sempiternam Noverit universitas vestra quod cum auctoritate domini pape coram judicibus delegatis esset mota controversia inter religiosos viros abbatem et conventum de Lundors ex parte una et me ex altera super quodam annuo redditu trium marcarum eisdem abbati et conventui per dominum Willielmum de Campaniis cui ego jure hereditario succedo in puram et perpetuam elemosinam pro se et heredibus suis collatarum et in terra sue de Stokes in Comitatu Leycestre assignatarum sicut plenius continebatur in carta dicti domini Willelmi super hoc confecta ex carta consciencia sua sigillo suo signata cujus tenor talis erat [] Tandem ego Robertus in judicio constitutus inspecto tenore predicte carte non cancellate non abolite nec in aliqua parte sui viciate confessus sum me et heredes meos teneri in perpetuum singulis annis predictis abbati et conventui in tribus marcis sterlingorum solvendis annuatim in festo Penthecostes juxta tenorem predicte carte ac post hujusmodi confessionem in judicio factam mediantibus eisdem judicibus delegatis et aliis viris fide dignis predicta controversia conquievit sub hac forma videlicet quod predicti abbas et conventus ad peticionem meam remiserunt michi omnia arreragia dampna et expensas que vel quas petebant a me in judicio occasione dictarum trium marcarum detentarum a tempore obitus dicti domini W de Campaniis usque in diem veneris proximam post festum Sancti Mathie apostoli Anno gracie MCCL nono et preterea assignacioni eisdem abbati et conventui facte in terra de Stokes de predictis tribus marcis renunciaverunt propter quod ego Robertus de Campaniis prefatis religiosis predictas tres marcas assignavi in terra mea de Castelton de Borg in Galwythia percipiendas in perpetuum singulis annis de dicta terra mea de Castelton die sancte trinitatis sibi et successoribus suis per certum nuncium ad hec destinatum per manus meas et heredum meorum vel assignatorum vel tenencium meorum quicunque dictam terram pro tempore tenuerint Volo eciam et concedo et hac presenti carta mea confirmo pro me et heredibus meis et assignatis ut predicti religiosi predictas tres marcas sine aliqua molestia gravamine vel contradiccione annuatim percipiant et in puram liberam et perpetuam elemosinam habeant et possideant Et ne in posterum predicti religiosi in percepcione dictarum trium marcarum aliquam molestiam paciantur obligo me et heredes meos et assignatos corporali super hoc in presencia dictorum judicum prestito juramento quod predictam terram in qua eisdem assignavi dictas tres marcas nunquam ego vel heredes mei sive assignati alienavimus per quod impediantur easdem tres marcas statuto termino percipere Suppono eciam me et heredes meos et assignatos ac tenentes meos dicte terre jurisdiccioni venerabilium patrum Sancti Andree et Candide case episcoporum qui pro tempore fuerint Ita quod si aliquando cessatum fuerit termino statuto a dictarum trium marcarum solucione vel prefati religiosi aliquod impedimentum incurrerint in perceptione dictarum trium marcarum per me uel per heredes meos uel assignatos siue per dicte terre tenentes meos seu per quemcunque alium de meis vel meorum nomine dicti episcopi vel eorum alter qui fuerit ex parte dictorum abbatis et conventus requisitus me et heredes meos et assignatos ac dicte terre tenentes meos ac quoscunque alios meo vel meorum nomine impedientes quo minus dicti religiosi dictas tres marcas sine molestia et gravamine possint libere percipere tantum unica monicione premissa possint vel possit vinculo excommunicacionis innodare nunc quam relaxande quousque dictis religiosis de totali prefato redditu trium marcarum dampnis expensis et interesse plenaria fuerit satisfactum nisi generalis guerra fuerit in terra Super cessacione vero solucionis dictarum trium marcarum ad terminum statutum expensis dampnis et interesse simplici assercioni procuratoris dictorum abbatis et conventus quicunque fuerit ad hoc constitutus fides plene adhibebitur sine onere alicujus probacionis Prefati vero monachi ad peticionem meam caritative concesserunt michi ut singulis diebus in perpetuum in ecclesia sua fiat specialis commemoracio in una missa pro animabus patris mei et domini Roberti de Campaniis et omnium fidelium defunctorum juxta tenorem dicte carte domini Willelmi de Campaniis quam quidem cartam michi post confeccionem presentis scripti resignaverunt Et ut hec omnia rete et inconcussa permaneant in perpetuum presenti scripto sigillum meum apposui Et ad majorem securitatem et testimonium predicti domini episcopi et dominus Rogerus de Quency Comes Wynton et Constabularius Scocie ad peticionem meam eidem Scripto sigilla sua pariter apposuerunt Datum apud Borg sabbato proximo ante dominicam in ramis palmarum anno domini MCCLX