Charter Document - 05150112
| Charter Number: | 05150112 |
|---|---|
| Cartulary Title: | The Chartulary of the Abbey of Lindores |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1257 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Omnibvs christi fidelibus hoc scriptum visuris uel audituris Joachim de Kynbuc miles eternam in domino salutem Nouerit uniuersitas vestra quod cum auctoritate apostolica mota esset causa coram archidiacono Dunkeldensi inter uiros religiosos abbatem et conuentum de Lundors actores ex vna parte et me reum ex altera ac ex parte dictorum abbatis et conuentus mihi esset editum sub hac forma Dicunt abbas et conuentus de Lundors contra dictum Joachym de Kynbuc militem quod cum ipsi et homines eorum essent in pacifica possessione capiendi materiem in bosco de Curelundyn in Stratherne ad edificia sustinenda et reparanda in terra sua de fedal que est in Cather Mothyl et similiter ea que pertinent ad agriculturam dictus Joachim prefatos abbatem et conuentum prefata sua pacifica possessione contra iusticiam spoliauit Quare dictus Abbas et conuentus petunt ad possessionem suam pristinam restitui et predictum Joachim ad possessionem eandem eisdem abbati et conuentui faciendam plenaria per censuram ecclesiasticam compelli Hec dicunt et petunt saluo sibi iuris beneficio in omnibus Protestantes se uelle petere expensas in lite factas et de cetero faciendas Tandem ego Joachim pro contumacia a dicto archidiacono ab ingressu ecclesie auctoritate apostolica suspensus lesamque in hac parte habens conscienciam liti pocius cedere quam contendere existimaui Vnde prestito super hoc corporali iuramento pro me et successoribus meis omnibus et singulis fideliter promissi quod prefatos abbatem et conuentum prefata possessione sua capiendi materiem in predicto bosco libere gaudere permittam Nec eos uel successores suos uel homines eorum aliquatenus super premissis in posterum vexabo inquietabo perturbabo nec perturbacionem aliquam per me uel per alios procurabo Volo eciam et concedo si ego contra prefatam litis cessionem prestiti iuramenti obseruacionem et promissionem contrauenire presumpsero uel aliquis successorum meorum contra premissa attemptare presumpserit quod ex tunc ad omnis premissa et singula fideliter in perpetuum obseruanda me et successores meos omnes et singulos obligando jurisdiccioni archidiaconi Sancti Andree qui pro tempore fuerit subieci Videlicet ut dictus archidiaconus me et successores meos omnes et singulos ad omnis premissa et singula trina tantum monicione premissa absque omni strepitu judiciali per suspensionis excommunicacionis et interdicti sentencias in personam meam et successorum meorum libere ualeat compellere In cuius rei testimonium presenti scripto sigillum meum apposui Et sigillum dicti archidiaconi Dunkeldensis apponi procuraui Datum in crastino sancti Vincencii anni gracie MCCLVJ
Source (click image below to view full size)
