Charter Document - 05150106
| Charter Number: | 05150106 |
|---|---|
| Cartulary Title: | The Chartulary of the Abbey of Lindores |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Innocencivs episcopus seruus seruorum dei Dilectis filiis Cancellario Morauiensi Thesaurario et magistro Johanni de Euerley canonico Dunkeldensi salutem et apostolicam Benediccionem Presentata nobis Dilectorum filiorum de Kelchou de Aberbrodoch et de Lundors Abbatum Sancti Andree dioecesis Sancti Benedicti ac prioris cathedralis ecclesie Sancti Andree Sancti Augustini ordinum Conuentumque suorum peticio continebat quod cum bone memorie Aberdonenses Episcopi Capituli sui accedente consensu quasdam ecclesias Aberdonensis dioecesis in quibus Abbates prior et conuentus iidem itis obtinent patronatus in proprios usus eorum sibi duxerint concedendas et quod per eosdem episcopos taliter factum extitit in hac parte per apostolicam sedem fuerit postmodum confirmatum Venerabilis frater noster Aberdonensis Episcopus episcoporum illorum successor pro sua nobis suggerens uoluntate quod nonnulli abbates priores aliique prelati tam religiosi quam eciam seculares in ciuitate Aberdonensi et Dioecesi constituti vicariis quarundam ecclesiarum quas in proprios usus tenent imponentes nouas contra Lateranensis statuta concilij pensiones terras et alias possessiones ad uicarias spectantes easdem ipsis subtrahunt vicariis eas in usus proprios conuertendo Quidam uero prelatorum ipsorum tantum de prouentibus ecclesiarum percipiunt predictarum quod earum vicarij nequeunt de residuo comode sustentari a nobis obtinuit [litteras] continentes ut super hiis auctoritate nostra statueret prout utilitati ecclesiarum ipsarum secundum deum expedire uideret non obstantibus concessionibus quibuscunque et confirmacionibus eciam a sede apostolica impetratis Contradictores per censuram ecclesiasticam apellacione postposita compescendo Cumque litterarum ipsarum pretextu niteretur idem episcopus ordinare fines tenoris earum perperam excedendo quod prefati abbates prior et conuentus de prouentibus dictarum ecclesiarum certam annuatim reciperent porcionem et omnes reliqui prouentus ipsarum assignarentur vicariis earundem Jam dicti abbates prior et conuentus se ac ecclesias suas seu monasteria sua per ordinacionem huiusmodi sencientes indebite aggrauari per apellacionis remedium nostram audienciam inuocarunt cui dictus episcopus detulit reuerenter sicut in eius litteris perspeximus contineri Quocirca discrecioni uestre per apostolica scripta mandamus quatinus facultatibus ipsarum ecclesiarum diligenter solliciteque pensatis in eis prout discrecio uestra secundum deum uideret expedire certas et determinatas curetis statuere uicarias et de prouentibus ecclesiarum illarum porcionem ipsis congruam assignantes nominatos abbates priorem et conuentus postea contra ordinacionem vestram super hiis nullatenus permittatis ab aliquibus indebite molestari molestatores huiusmodi per censuram ecclesiasticam sublato appellacionis obstaculo compescendo Non obstantibus aliquibus litteris ueritati et iusticie preiudicantibus per quas execucio mandati presentis impediri ualeat uel differri et de quibus specialem oporteat in presentibus fieri mencionem Quod si non omnes hiis exequendis potueritis interesse duo uestrum ea nihilominus exequantur Datum Lugdun xij Kalend Maij Pontificatus nostri anno Septimo
Source (click image below to view full size)
