Charter Document - 05150104

Innocencivs episcopus seruus seruorum dei Dilectis filiis abbati de Dunfermelyn et priori de May Sancti Andree dioecesis Salutem et apostolicam Benediccionem Ex parte dilectorum filiorum abbatis et conuentus monasterij de Lundors ordinis Sancti Benedicti Sancti Andree dioecesis fuit propositum coram nobis quod non [n]ulli clerici et laici asserentes contra eos aliquid questionis habere aliquando monachos interdum conuersos et non nunc quam animalia et alia Bona dicti monasterij pretextu cuiusdam praue consuetudinis temeritate proprie uadiare inuadere et tam diu detinere presumat donec sit eis de huiusmodi questionibus iuxta ipsorum beneplacitum satisfactum quamquam in eos non habeant qua hoc possint iurisdiccionem ordinariam uel eciam delegatam Cum itaque iudicialis ordo ideo sit constitutus in medio ut nemo sibi audeat presumere ulcionem et ob hoc id tanquam nullo iure subnixum non sit aliquatenus tolerandum Nos uolentes quieti ipsorum consulere ac predictorum maliciis obuiare auctoritate apostolica duximus districcius inhibendum ne quis occasione predicte consuetudinis eis memoratas inferre molestias ac bona predicti monasterij absque iuris ordine occupare seu quolibet modo detinere presumat Quocirca discrecioni uestre per apostolica scripta mandamus quatinus ipsos non permittatis contra inhibicionis nostre tenorem super hiis ab aliquibus indebite molestari Molestatores huiusmodi per censuram ecclesiasticam appellacione postposita compescendo Datum Lugdun v kalend Maij Pontificatus nostri anno septimo