Charter Document - 05150093

Celestinvs Episcopus seruus seruorum dei Dilectis filiis abbati et fratribus monasterij de Lundors salutem et apostolicam benediccionem Officij nostri debitum et caritas ordinata requirunt vt eorum deuocionem ad incrementum plenius attento sollicitudine prouocemus qui ampliando creatoris obsequio diligenter insistunt et firmum iam propositum assumpserunt ad idem forcius ac feruencius ipsius fauente gracia intendendi Ea propter Dilecti in domino filij propensius attendentes quod Dilectus filius noster Nobilis uir Dauid Comes frater Karissimi in Christo filij nostri W illustris Regis Scocie monasterium uestrum ea intencione fundauerit ac dilatauerit plurimis bonis ut dignus in eo debeat domino sub monastico habitu famulatus impendi et affectu habeat possessiones et redditus eius vberius ampliandi eius instanti supplicacione deuicti monasterium ipsum in quo diuino mancipati estis obsequio a iurisdiccione quorumlibet eximentes in ius et proprietatem beati Petri suscipimus et presentis scripti patrocinio communimus In primis siquidem statuentes ut ordo monasticus qui secundum Deum et beati benedicti regulam in eodem monasterio institutus esse dinoscitur perpetuis ibidem temporibus inuiolabiliter obseruetur Preterea quascunque possessiones quecunque bona idem monasterium in presenciarum iuste ac pacifice possidet aut in futurum concessione pontificum largicione regum uel principum oblacione fidelium seu aliis iustis modis prestante domino poterit adipisci firma vobis uestrisque successoribus et illibata permaneant In quibus hec propriis duximus exprimenda uocabulis Locum ipsum in quo prefatum monasterium situm est cum omnibus pertinenciis suis per suas rectas diuisas ex dono et concessione eiusdem Comitis et liberam curiam in terra uestra et firmam pacem infra diuisas ipsius uille de Lundors sicut carta ipsius Comitis protestatur Ecclesiam quoque eiusdem uille de Lundors cum omnibus iustis pertinenciis suis et terram ad predictam ecclesiam pertinentem per rectas diuisas suas et alias terras in eadem uilla que terre in carta eiusdem Comitis continentur Et asiamenta insule que vocatur redinche communia uobis sicut et comiti ad proprios usus vestros et vnam piscariam in They iuxta prenominatam insulam et molendinum predicte uille de Lundors cum omni secta sua et multura Ecclesiam quoque de Dunde cum omnibus pertinenciis suis et vnum toftum in burgo de Dunde liberum et quietum ab omni seruicio et exaccione Et ultra muneth fintrith per rectas diuisas suas cum omnibus pertinenciis et ecclesiam eiusdem uille cum pertinenciis suis Et in Garuiach Ledhgauel et Malind cum omnibus pertinenciis suis et per rectas diuisas suas Et ecclesiam de Rothket cum capellis suis scilicet Inueruryn et Munkegin et cum aliis pertinenciis suis Et ecclesiam de Durnach ecclesiam de Prame ecclesiam de Radmuriel ecclesiam de Ingemabanin ecclesiam de Culsamuel et in episcopatu Lincolniensi ecclesiam de Cunigton ecclesiam de Kelalcmund cum capellis earundem ecclesiarum terris et decimis et omnibus earum pertinenciis ad proprios usus et sustentaciones vestras Et vnum toftum in burgo de Inueruryn liberum et quietum ab omni seruicio et exaccione Decimam eciam omnium lucrorum et placitorum eiusdem Comitis infra terram suam et extra ultra muneth quam habuit tempore quo fecit donacionem istam Et Decimam omnium lucrorum ipsius que ei proueniunt de lucris predicti Regis in toto regno suo et decimam omnium Rerum dicti Comitis et heredum suorum ultra moneth Ex donacione quoque memorati regis vnum plenarium toftum in burgo suo de Berewic et vnum plenarium toftum in burgo suo de Striuelin Et unum plenarium toftum in burgo suo de Karel et vnum plenarium toftum in burgo suo de Perth Et vnum plenarium toftum in burgo suo de forfar et vnum plenarium toftum in burgo suo de Munros et vnum plenarium toftum in burgo suo de Aberden Ex donacione uero Roberto de Lundres filij prefati regis vnum plenarium toftum in burgo de Inuerkeythyn sicut hec que prediximus iuste ac pacifice possidetis ut in donatorum earum scriptis autenticis continetur Vobis et per uos monasterio uestro auctoritate apostolica confirmamus Sane Noualium uestrorum que propriis manibus aut sumptibus colitis siue de nutrimentis animalium uestrorum nullus a uobis decimas exigere uel extorquere presumat Liceat quoque uobis clericos et laicos liberos et absolutos e seculo fugientes ad conuersionem recipere et eos absque contradiccione retinere Prohibemus insuper ut nulli fratrum uestrorum post factam in eodem loco professionem fas sit absque abbatis sui licencia de eodem loco nisi arcioris religionis obtentu discedere Discedentem uero absque communium litterarum caucione nullus audeat retinere Cum autem generale interdictum terre fuerit liceat uobis clausis ianuis exclusis excommunicatis et interdictis non pulsatis campanis suppressa uoce diuina officia celebrare In parochialibus uero ecclesiis quas habetis liceat uobis sacerdotes eligere et dioecesanis episcopis presentare quibus si idonei fuerint episcopi curam animarum committant ut eis de spiritualibus vobis uero de temporalibus debeant respondere Crisma uero oleum sanctum Consecraciones altarium seu basilicarum ordinaciones clericorum qui ad sacros ordines fuerint promouendi a dioecesano suscipietis episcopo si quidem catholicus fuerit et graciam et communionem apostolice sedis habuerit et ea uobis uoluerit sine pravitate qualibet exhibere Alioquin liceat uobis quemcunque malueritis catholicum adire antistitem graciam et communionem apostolice sedis habentem qui nostra fretus auctoritate vobis quod postulatur impendat Obeunte uero te nunc eiusdem loci abbate uel tuorum quolibet successorum nullus ibi qualibet surrepcionis astucia seu uiolencia preponatur nisi quem fratres communi consensu uel fratrum maior pars consilij sanioris secundum dei timorem et Beati benedicti regulam prouiderint eligendum Prohibemus eciam ne quis in uos uel monasterium vestrum excommunicacionis suspensionis uel interdicti sentenciam sine manifesta et racionabili causa promulgare presumat Interdicimus autem ut nulli licitum sit infra terminos parochiarum vestrarum ecclesiam cimiterium oratorium uel xenodochium de nouo construere seu constructa alij subdere absque vestro et dioecesani episcopi assensu saluis priuilegiis romanorum pontificum Sepulturam preterea ipsius loci liberam esse decernimus ut eorum deuocioni et extreme uoluntati qui se illic sepeliri deliberauerint nisi forte excommunicati uel interdicti sint nullus obsistat salua tamen iusticia illarum ecclesiarum a quibus mortuorum corpora assumuntur Decernimus ergo ut nullis omnino hominum fas sit personas vestras seu monasterium ipsum temere perturbare uel nouis et indebitis exaccionibus fatigare aut hanc nostre paginam confirmacionis exempcionis et constitutionis infringere uel ei ausu temerario contraire Si quis autem hoc attemptare presumpserit indignacionem omnipotentis dei et beatorum Petri et Pauli apostolorum eius se nouerit incursurum Ad indicium autem huius a sede apostolica libertatis percepte duos bisancios nobis et successoribus nostris annis singulis persoluetis Datum Lateran viij Id Marcij Pontificatus nostri anno quarto