Charter Document - 05130180
| Charter Number: | 05130180 |
|---|---|
| Cartulary Title: | Early Scottish Charters Prior to A.D. 1153 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1147 |
| Date type: | Internal, A.D., Calendar, Papal |
| Resource Link(s): |
People of Medieval Scotland |
Charter:
Eugenius Episcopus servus servorum Dei Dilectis filiis Willelmo abbati ecclesie Sancte Marie de Striueling ejusque fratribus tam presentibus quam futuris regularem vitam professis in perpetuum Ad hoc universalis ecclesie cura nobis a provisore omnium bonorum Deo commissa est ut religiosas diligamus personas et beneplacentem Deo religionem studeamus modis omnibus propagare nec enim Deo gratus aliquando famulatus impenditur nisi ex caritatis radice procedens a puritate religionis fuerit conservatus ea propter dilecti in Domino filii vestris justis postulationibus dilecti filii nostri fratris Roberti prioris Sancti Andree precibus inclinati clementer annuimus et prefatam ecclesiam in qua divino mancipati estis obsequio sub Beati Petri et nostra protectione suscepimus et presentis scripti privilegio communimus Statuentes ut ordo canonicus de Arrosia que per te dilecte in Domino fili Willelme abbas preveniente gratia Dei consilio et auxilio venerabilis fratris nostri Roberti episcopi Sancti Andree in eadem ecclesia noscitur institutus perpetuis ibidem temporibus inviolabiliter conservetur Preterea quascunque possessiones quecunque bona eadem ecclesia in presentiarum juste et canonice possidet aut in futurum concessione pontificum largitione regum vel principum oblatione fidelium seu aliis justis modis Deo propitio poterit adipisci firma vobis vestrisque successoribus et illibata permaneant que propriis dignum duximus exprimenda vocabulis terram videlicet de Dumbodelin cum aquis et terram de Cambuskynneth cum piscatura et rethe in aqua et terram de Collyne cum nemore et decimam de dominiis regis de Striueling et de reditibus regis XL solidos et canum unius navis Decernimus ergo ut nulli omnino hominum liceat prefatam ecclesiam temere perturbare aut ejus possessiones auferre vel ablatas retinere minuere aut aliquibus vexationibus fatigare sed omnia integra conserventur eorum pro quorum gubernatione et sustentatione concessa sunt usibus omnimodis pro futura salva sedis apostolice auctoritate et episcopi Sancti Andree canonica reverentia si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpora ac sanguine Dei et Domini Redemptoris nostri Jesu Christi aliena fiat atque in extremo examine districte ultioni subjaceat cunctis autem eidem loco juste servantibus sit pax Domini nostri Jesu Christi quatenus et hic fructum bone actionis percipiant et apud districtum judicem premia eterne pacis inveniant Amen Ego Eugenius catholice ecclesie episcopus Ego Odo diaconus cardinalis S Georgii ad Velum Aureum Ego Abbericus Ostiensis episcopus Ego Johannes Paparo diaconus cardinalis S Adriani Ego Hubaldus presbyter cardinalis Sanctorum Johannis et Pauli Ego Igmarus Tusculanus episcopus Ego Gregorius diaconus cardinalis Ego Gilbertus indignus sacerdos S Martini Datum Altisiodori per manum Guidonis sancte Romane ecclesie diaconi cardinalis et cancellarii tertio Kalendas Septembris indictione decima incarnationis dominice anno millesimo centesimo quadragesimo septimo pontificatus vero domini Eugenii tertii pape anno tertio