Charter Document - 05130042
| Charter Number: | 05130042 |
|---|---|
| Cartulary Title: | Early Scottish Charters Prior to A.D. 1153 |
| Charter Language: | Latin |
| Charter Origin: | Religious |
| Charter Type(s): | Recommendation |
| Date: | 1121 - 1122 |
| Date type: | Assigned |
| Resource Link(s): |
People of Medieval Scotland |
Charter:
Alexandro illustri Regi Scottorum Radulfus Cantuariensis Ecclesie Minister et fratrum conventus Domino Christo in ea deserviens per ilium in terra regnare cui famulatur omnis militia celestis Novit prudentia vestra carissime Domine quanto tempore sedes episcopalis que in patria vestra precipua habetur suo caruerit pastore que procul dubio quanto fuerit suo destituta vigore tanto deterius subditorum ruina inde proveniet Unde hortamur serenitatem vestram quam divina propitiatio inter alios reges ita absque notabili reprehensione hujusque honoravit ut ab omnibus laudabilis habeatur quatenus tanto religionis detrimento finem dantes pastorem quem vos canonice elegistis et nos legaliter ad vos misimus ad sedem suam ex bona voluntate vestra revocetis Et cum nec in vobis nec in ipso culpa pateat quare hoc digne fieri non debeat ex patrum auctoritate non intelligimus qualiter isto vivente alium memorata ecclesia vestra possit sortiri episcopum quia sponsa Dei suo superstite ne fiat adultera nisi legalem omnem contemnit maritum Quapropter quomodocunque hactenus hoc dilatum fuerit virum sicut speramus vobis utilem et in lege Dei a pueritia nobiliter instructum in primum dilectionis vestre gradum et in officium sibi injunctum pro vestra gloria revocate Deus pacis et dilectionis a quo omne bonum consilium procedit sit semper vobiscum Quid vobis videatur de iis que vobis mandamus nobis precamur rescribi facite Valeat dilectio vestra cum domina Regina uxore vestra et cum omnibus qui ea que justa sunt volunt et vos diligunt gloriose domine et honorande Sancte Matris Ecclesie fili Amen