Charter Document - 05130040

Alexandro illustri Regi Scottorum Frater Radulfus Cantuariensis Ecclesie Minister sic regnare in regno terreno ut cum Christo regnare possit in celo Gratias quas possumus [Venerabilis Domine] sublimitati vestre referimus pro dilectionis et honoris munere quod erga parvitatem nostram nuntiis et litteris referentibus vos habere dignoscimus In quo nos proculdubio nos pro posse semper devotos habebitis et si quid in vita nostra [Domino largiente] fructuosum inveniatur vestrum esse secure sciatis Gratias etiam ex bona voluntate vobis persolvimus pro susceptione carissimi filii nostri Eadmeri videlicet electi episcopi vestri quem secundum petitionem vestram vobis transmissum honorifice tractastis quem nos etiam ad partes nostras redeuntem prout decuit tantam personam officiose suscipientes in adventu ipsius non mediocriter letati sumus Cumque secretius postea inter nos sermo versaretur audivimus eum aliqua a sensu litterarum vestrarum quas prius audieramus diversa sentire nec omnibus antea auditis ex toto assensum prebere Nunc itaque quoniam in scriptis vestris aliud legimus et aliud ab ipso fratre percepimus consilio nobis est ut eundem filium nostrum apud nos retineamus quousque Domino ducente in Angliam veniatis nisi forte aliquid aliud quod nobis faciendum sit antea mandaveritis Cum autem [Deo donante] vobis presentialiter loqui et rerum causas hinc inde audire poterimus si vita et doctrina hujus amici nostri vobis et patrie vestre utilis esse videtur injuncta sibi obedientia ad electionis sue locum si eum suscipere vultis redire poterit Si vero in conspectu vestro aliud placitum fuerit nos eum ut virum in lege Domini multipliciter instructum et omni bono operi apturn cum magno gaudio retinebimus et sic spem bonam in misericordia Dei habentes ejus reditum fructuosum habebimus Vale