Charter Document - 05130039
| Charter Number: | 05130039 |
|---|---|
| Cartulary Title: | Early Scottish Charters Prior to A.D. 1153 |
| Charter Language: | Latin |
| Charter Origin: | Royal |
| Charter Type(s): | Resignation |
| Date: | 1120 |
| Date type: | Assigned |
| Resource Link(s): |
People of Medieval Scotland |
Charter:
Alexander Dei gratia Rex Scottorum Radulfo Archiepiscopo Cantuariensi in ipso qui vita est semper vivere Immense bonitati vestre petitioni mee condescendenti personam in presulatu Sancti Andree sublimandam mihi mittendo animi mei affectus benevolens et ut justum est obnoxius innumerabiles gratias reddit Sed persona in episcopatu posita consuetudinibus terre moribusque hominum ut res et tempus exigebat et ut justum et necessarium esset condescendere noluit Ipsa vero tandem persona in presentia quorundam episcoporum et comitum proborumque terre mee virorum me requisivit ut ei licentiam recedendi et de fidelitate quam mihi fecerat libertatem concederem cum nullo modo remanere vellet nisi eum in captione detinerem Hec audiens ei his verbis respondi quod si aliquas dictis vel factis injurias ei a me illatas et quod in aliquibus que ei facerem debuissem me defecisse demonstraret pro Dei amore et meo honore libentissime presto essem emendare Ad hec in presentia omnium adstantium dixit quod nullas dictis aut factis ei injurias injeceram nec unquam in aliqua re quam ei facere debuissem defeceram Preterea egomet et episcopi et consules aliique terre mee probi homines ibi adstantes reverentie obedientiam in quibuscunque justum esset magna animi benignitate obtulimus et pro penuria honeste exhibitionis reverentie non esse necesse ei presulatum relinquere cum magna admonitione retulimus ut etiam remaneret donec Regi Anglie et vobis nuntiassem ut amborum consilio frui possem obnixe rogavimus His auditis mihi respondit quod nullo modo remaneret nisi eum in captione detinerem se enim nec utilem nec idoneum in presulatus regimine sciebat et si remaneret detrimentum anime sue et aliorum imminere videbat Communi tandem consilio nolui eum vi retinere petitioni sue quamvis invitus adquievi et episcopatum reddidit et fedus amicitie inter me et ipsum osculo confirmavit Et hec est rei veritas quam litteris vobis declarare volui ne si aliud ad aures vestras perveniret crederetis Sciat denique bonitas vestra quod vobis penitus ut amicus fidelis obnoxius esse cupio et consilio vestro vestre etiam dilectioni subdi desidero Ut Domino Eadmero honorem exhibeas obnixe postulo Vale