Charter Document - 05130028

Domino et Patri carissimo Radulfo venerabili Cantuariensi Archiepiscopo Alexander Dei misericordia Rex Scottorum salutem et devote fidelitatis obsequium Notificamus vobis benignissime pater quod episcopus ecclesie Sancti Andree Apostoli dominus videlicet Turgodus II Kal Septembris migravit a seculo Unde valde contristamur tanto solatio destituti Requirimus ergo vestre [paternitatis] consilium et auxilium sicut confidimus in vobis ut secundum Deum talem substituere valeamus qui nos et gentem nostram per Deo placitam conversationem regere et docere utiliter sciat Petimus etiam ut recordari dignemini quid vobis jam quadam vice suggessimus de episcopis ecclesie Sancti Andree quod in antiquis temporibus non solebant consecrari nisi ab ipso Romano Pontifice vel ab Archiepiscopo Cantuariensi hocque tenuimus et per successiones temporum ex auctoritate ratum habuimus quousque Dominus Lanfrancus Archiepiscopus nescimus quo pacto absentibus nobis et nostris Thome Eboraci Archiepiscopo illud ad tempus relaxaverat Quod omnino vestra si placet auctoritate suffulti ut amplius sic remaneat non concedimus Nunc igitur si ad id nobis nostreque ecclesie reparandum vestrum adjutorium sperare debemus quod humillimis votis desideramus et petimus secreto nobis certitudinem dignis vestris apicibus remandare curate Valete