Charter Document - 05101217

Ge Huedes dux de Berguoinne faiz savoir à tous cels qui sont et qui sont avenir que ge ai quitté à mes homes de Rouvres toute taille et lor ai doné et otroyé quanque ge ay à Rouvre en terres en prez en rantes fors les hoirs Jehan Fortier et Lambert Fortier et lor hoirs et Jehan Lou Deien et ses frères et lor hoirs por mile setiers de blé moitié froment et moitié avoine et por un giste de dix livres et sis setiers d'avoine à moi ou à mon commandement chascun an à paier Et est assavoir que li Maires et dui sergent soulement desouz le Maiour au regart des homes de Rouvres seront establi en la ville devant dite Li homes devant dit ne se jostiseront mais que por lou Maiour et pour les dous sergenz devant diz et li Maires et li dui sergent mais que por moi ou por mon commandement ne se jostiseront Mi forfait de cele vile seront levé à la menière et à la mesure que ge ay estably as diz homes et seront rendu à moi ou à mon commandement Et que ceste chose soit estable ge ay confirmé ceste chartre de mon seal Ce est fait à la seint Jehan en l'an de l'Incarnation nostre Seigneur mil CC et quinze entrant novambre