Charter Document - 05101178

Ou nom dou Père et dou Fils et dou Saint Esprist amen Gie Odes dux de Burgoigne à toz ces qui sunt et qui saront et qui verront ces présentes letres et cognoissance de ceste chose Vous aiez cogneu que je hay doné et otroyé à mes homes qui sunt et qui serunt en ma rue de Chaumont à Chastillon sus Soigne tel franchise que li plus riches ou li plus poissens qui demore ou qui demorra en cele rue sara quittes de tote taille et de tote exaction por XX sols de la monée de Digenois à rendre chascun an à la feste Saint Reme Et li plus povre et cil qui ont moins de povoir devront à la tauxation de quatre proudomes qui seront esleu de la communauté de Chaumunt Et cil quatre ordineront totes les choses qui saront à ordiner entre les hommes demoiranz à Chaumunt et orront les claintes et apaiseront les descors et termineront les causes Tui forfait et mes amandes saront levé par la main de quatre proudomes aus us et aus costumes de Talant Li prevoz de Chastillon n'aura droit ne pooir an aus se il ne reçoit mes rantes an Chaumunt par mon commandement Et ce sara fait à la considération des quatre proudomes esleus Et je devanz diz Odes dux de Bergoigne promet am bone foi et suis tenuz de garantir à touz iorsmais la dite franchisse Et porce que ce soit ferme chose et estauble j'ay mis mon scial en ces letres Ce fut doné à Talant mon chastial en l'an de grâce MCC et XIII ou mois d'aost par la main Vurri mon chapelain pardevant Gauchier de Chastillon mon seneschaut et Poinçot de Froulois mon mareschaut et Gervaise Chauchar mon chambalant