Charter Document - 05101066

Comme certains plaiz et procès feussent meuz et pendans en la court de Parlement entre le procureur de hault et puissant prince Monseigneur le duc de Bourgoingne demandeur d'une part et les Maire et eschevins bourgoys et habitans et plusieurs singuliers habitans de ladite ville de Dijon deffendeurs d'autre part sur ce que le procureur dudit Monseigneur le Duc disoit que icelluy Monseigneur le duc estoit seigneur en demaine de ladite ville et que lesdiz Maire et eschevins qui ont certains priviléges à eulx octroyez par les prédécesseurs dudit Monseigneur le Duc ne peuvent ne ne doibvent aulcune chose entreprendre contre les nobleces seigneuries et droiz dudit Monseigneur le Duc et que se aulcune chose ont entrepris contre la seigneurie ils en devoient estre puniz et contrains à cessier et que ce nonobstant lesdiz Maire eschevins et singuliers en abusant de leurs privileiges avoient entrepris contre raison et la teneur d'iceulx privileges en plusieurs manières contre la seigneurie et droiz dudit Monseigneur le Duc es articles qui cy après seront plus à plein éclairez pourquoy concluoit ledit procureur que pour raison desdits abuz et excès lesdiz Maire et eschevins eussent forfaiz touz leurs priviléges que la commune de ladite ville fust dissolue et que la justice de ladite ville demeurast à plain en la main dudit Monseigneur le Duc et fussent lesdits deffendeurs condamnez en grosses amendes envers ledit Monseigneur le Duc et en ses dommages et intérêtz et despens en faisant plusieurs autres conclusions déclairées es escriptures sur ce baillées par manière de mémoire par ledit procureur en ladite court de Parlement Lesdiz défendeurs disans qu'ils estoient noblement fondez en corps et en commune par les prédécesseurs dudit Monseigneur le Duc qui leur avoient donnez et ottroiez leurs privileiges franchises et droiz desquel ils avoient joy et usé depuis le temps de leur fondation de si longt temps qu'il n'estoit memoire du contraire et outre avoient plusieurs usaiges coustumes possessions et saisines plus larges que leurs priviléges ne contiennent Lesquelx privileiges franchises coustumes usaiges possessions et saisines ledit Monseigneur le Duc avoit promis tenir et garder Disoient outre que es faiz et articles desquels ils estoient poursuis par le procureur dudit Monseigneur le Duc ils avoient bien et deument usé sans méffaire ne offendre contre la seigneurie droiz et nobleces dudit Monseigneur le Duc en proposant plusieurs autres faiz et raisons concluans affin que ledit procureur ne feist à recevoir ou qu'il n'eust cause ne action de faire les demandes requestes et conclusions par luy faictes et que lesdits deffendeurs en fussent absols avec autres conclusions plus à plain déclairées es mémoires baillez par lesdits defendeurs pardevers ladite court Finalement par le moyen des gens du conseil dudit Monseigneur le Duc et pource que lesdiz Maire eschevins habitans et singuliers veulent tousjours demeurer en la bonne grâce et obéïssance dudit Monseigneur le Duc duquel et de ses prédécesseurs ils sont fondez et d'eulx ont les privileges franchises et libertez desquels ils usent et ont usé Pour bien de paix et nourrir bonne amour entre ledit Monseigneur le Duc leur seigneur et lesdits Maire eschevins habitans ses subjez traittié est accordé entre lesdites parties s'il plaist à ladite court de Parlement en la manière qui s'ensuit Premièrement sur ce que ledit procureur disoit que ledit Monseigneur le Duc qui est fils de Roy pouvoit user de prinse de vivres et autres choses nécessaires en son hostel en ladite ville de Dijon et ailleurs et que ce nonobstant lesdiz Maires et eschevins avoient entre eux ordonné que quiconque seroit Maire de ladite ville de Dijon il seroit tenuz de pourchacier à ses périls et despens que tout ce qui seroit prins de par ledit Monseigneur le Duc en ladite ville seroit rendu et payé à tous ceulx à qui il auroit esté pris et que le Maire en feroit faire satisfaction Disoient outre que lesdiz Maire eschevins n'avoient pas puissance de faire ordonnances ne estatuz sans licence et auctorité dudit Monseigneur le Duc et que ils avoient ordonné sans sa licence que se aulcun se faisoit partie pour estre Maire de ladite ville et il failloit à estre esleu à Mairie il paieroit à ladite ville cent livres tournois et que aucun ne pourroit estre Maire de ladite ville se il n'estoit si riche qu'il peust rendre à ycelle ville tout le dommaige que elle encourroit se ladite Mairie estoit mise en la main du seigneur par quelconque cause que ce feust et que se ladite Mairie estoit mise en la main du seigneur tous les biens du Maire seroient mis en la main de ladite commune jusques à tant que la main du Seigneur en feust levée Et outre ordonnèrent lesdiz Maire et eschevins que aulcun advocat plaidant pardevant eulx ne pourroit demander salaire ne pranre prouffit se la partie ne luy donnoit voluntairement Et avoient fait plusieurs autres constitucions et estatuz contre raison et le bon gouvernement de ladite ville en préjudice dudit Monseigneur le Duc et de ses droiz et nobleces Lesdiz Maire eschevins et habitans disant que tant de raison comme par leurs privileges coustumes et usaiges ils povoient faire constitucions statuz et ordonnances raisonnables et prouffitables pour le gouvernement de ladite ville et que ils tenoient les ordonnances constitucions et statuz yci recitez et autres par eux faiz estre prouffitables pour ladite ville et bon gouvernement d'icelle Accordé est que les ordonnances constitucions et estatuz dessus recitez seront mis au néant et n'en useront doresnavant lesdiz Maire eschevins et habitans ne aucuns singuliers d'iceulx ne autres Derechief sur ce que ledit procureur disoit que ledit Monseigneur le Duc à cause de son héritage et domainne prend chascun an certaine redebvance en ladite ville de Dijon appelée les mars et que lesdiz Maire et eschevins ne povoient aucun afranchir de ladite redevance ne aussi des tailles aydes et subvencions ayans cours en ladite ville et que lesdiz Maire et eschevins avoient afranchy plusieurs des singuliers habitans de ladite ville tant de ladite redevance des mars comme des tailles et subvencions qui avoient cours en ladite ville A quoy respondoient lesdiz Maire et eschevins que onques n'avoient aucun afranchi de ladite redevance des mars deuë audit Monseigneur le Duc mais bien estoit vray que des tailles et subvencions qui avoient eu cours en ladite ville lesdiz Maire et eschevins avoient afranchy ou faict tenir quittes aucuns des habitans singuliers d'icelle ville tant pour les services par eulx faiz à ladite ville comme pour plusieurs autres justes causes et que ce povoient faire lesdiz Maire et eschevins licitement par la teneur de leurs dits privileges Accordé est que les afranchissements dessusdits tant des mars se aucuns en ya comme des tailles et subvencions de ladite ville donnez par lesdiz Maire et eschevins seront mis à néant et n'en useront doresnavant lesdiz Maire et eschevins se ce n'est par le congié dudit Monseigneur le Duc et de ses successeurs Item disoit ledit procureur que lesdiz Maire et eschevins et singuliers habitans avoient fait et fait faire plusieurs édifices et empeschemens en plusieurs places communes estans en ladite ville en grant dommaige et préjudice dudit Monseigneur le Duc et de la chose publique lesdiz Maire et eschevins disans qu'ils ne sçavoient pas aucuns édifices ou empeschemens avoir esté faiz par eux ou de leur commandement qui ainsi feussent préjudiciables Accordé est que mondit seigneur le Duc deputera aucunes bonnes personnes en ce congnoissans qui visiteront lesdits édifices places et empeschemens se aucuns en y a qui soient en trop grant préjudice de lui et de la chose publique et se ils treuvent que ainsi soit feront oster l'empechement reparer l'euvre et remettre en estat deu et s'il n'y a grant dommage ou préjudice les euvres et edifices demoureront en l'estat qu'ils ont esté et sont En outre disoit ledit procureur que lesdiz Maire eschevins et habitans estoient tenus de mettre en bon estat et soustenir à leurs despens la forteresse de ladite ville en laquelle convenoit faire plusieurs grandes réparations desquelles faire lesdiz Maire eschevins et habitans estoient négligens si requéroient que par eulx feussent faites lesdiz Maire eschevins et habitans disans que ladite forteresse estoit en estat convenable et que s'il y falloit aucune réparation les gens d'église nobles et autres tenans et possedans héritages en ladite ville y devoient contribuer Accordé est que par l'ordonnance dudit Monseigneur le Duc et de son conseil lesdiz Maire eschevins et habitans et touz autres qu'il appartient de raison et usaige doivent contribuer aux réparations de ladite forteresse la mettront en bon estat se elle n'y est et doresnavant contribueront aux réparations qui à ce seront nécessaires Et aussi lesdiz Maire eschevins et habitans et tous autres qu'il appartient de raison et d'usaige selon l'ordonnance dudit Monseigneur le Duc ou de son conseil contribueront aux frais nécessaires pour mondifier ou nestoier ladite ville les rues et places d'icelle et les chemins communs qui sont environ ladite ville durant la banlieuë d'icelle ensemble les ponts et ponciaulx estans en ladite ville et banlieuë Derechef disoit ledit procureur que lesdiz Maire eschevins et habitans avoient receu plusieurs grans sommes de deniers pour tailles aides et subvencions imposées et levées en ladite ville tant sur les habitans d'icelle comme sur autres personnes pour cause de ladite forteresse et autres faiz de ladite ville desquel deniers ceulx qui les avoient receuz n'avoient pas compté mais avoient retenu grand partie d'iceulx deniers en préjudice dudit Monseigneur le Duc et de ladite ville Si requéroit ledit procureur que les comptes en fussent renduz et les rentes qui en seroient deues Lesdits defendeurs disans que à eulx en appartenoit oïr le compte et que les receveurs en avoient compté et se compte n'en avoient ils en compteroient pardevant lesdiz Maire et eschevins Accordé est que ceulx qui ont receu les deniers dessusdits depuis trante ans derreinerement passez ou leurs hoirs et ayans cause en compteront devant certains commissaires que ledit Monseigneur le Duc y deputera qui orra lesdiz comptes présens deux ou trois bonnes personnes de ladite ville telles que lesdiz Maire eschevins esliront s'il leur plaist et se lesdiz receveurs leurs hoirs et ayans cause sont trouvez debvoir aucunes restes ils seront contrains de païer et seront les deniers convertis au prouffit de ladite ville et ainsi sera faict doresnavant quant ceulx qui pour ladite ville recevront aucuns deniers Et ne pourront lesdiz Maire eschevins et habitans imposer ne lever doresnavant aucune taille ayde ou subvencion en ladite ville sans le faire savoir premièrement au bailli de Dijon ou à son lieutenant qui pour le temps sera en son absence afin que l'un d'eulx y soit présent s'il lui plaist pour savoir tout le fait et que aucun desdiz habitans ne soit chargié outre raison Item disoit ledit procureur que de raison et d'usage notoire lesdiz Maire et eschevins ne povoient ne ne devoient donner sauvegarde generaulx et que ils en avoient donné à plusieurs notables personnes contre la teneur de leurs privilèges et en abusant d'iceulx a quoy respondoient lesdiz Maire et eschevins qu'ils les povoient bien donner veuz leursdiz privileges et que ainsi en avoint usé Accordé est que doresnavant lesdiz Maire et eschevins ne donneront telles sauvegardes à quelque personne que ce soit et celles qu'ils ont données sont mises au néant Disoit oultre ledit procureur que lesdiz Maire eschevins ne povoient recevoir contraulx convenables ne obligations se n'estoient eux estant en jugement exerçeans faiz judiciaires et que en plusieurs cas leurs clercs et jurez y avoient fait le contraire si requéroit que tout ce qu'ils en avoient fait feut mis au néant qu'ils feusent condempnez à en cesser et à l'amander Lesdiz defendeurs disans que attendu qu'ilz ont la justice haute moyenne et basse en ladite ville et banlieuë et qu'ils sont fondez par privileges comme dit est ils povoient recevoir lesdites obligacions procurations et convenances tant en jugement comme dehors et que ainsi en avoient usé Accordé est que doresnavant lesdiz Maire eschevins et bourgoys de Dijon ne useront des choses dessusdites fors eulx estans en jugement comme dit est Disoit oultre ledit Procureur que ledit Monseigneur le Duc estant pieça en son chastel de Rouvre lesdiz Maire et eschevins avoient baillé par escript une supplication pardevers ledit Monseigneur le Duc contre les gens de son conseil en les chargant de le avoir esmeu contre lesdiz Maire eschevins et habitans yceulx Maire eschevins et habitans disans que ils n'avoient oncques eu propos de chargier ou blasmer pour ladite supplication ne autremant les gens de son conseil laquelle supplication fut veue par ledit Monseigneur le Duc par la quelle luy est apparu qu'elle estoit injurieuse contre l'onneur de sesdites gens Item disoit ledit procureur que lesdiz Maire eschevins et plusieurs singuliers de ladite ville de leur volunté de fait avoient abatu et desmoli ou temps passé grand partie des édifices et murs du chastel de Dijon appartenant audit Monseigneur le Duc prins les pierres et autres matières dudit chastel et les appliquer à leur singulier prouffit en grand dommaige dudit Monseigneur le Duc si requeroit ledit procureur qu'il en fust desdommagiez et lesdiz deffendeurs condempnez à l'amender A quoi respondoient lesdiz deffendeurs qu'ils ne vouloient point soustenir que lesdiz édifices et murs peussent démolir et toutefois se aucuns desdiz habitans avoient en ce offendu l'amende ne povoit estre pour chascune fois que de soixante et cinq sols par les privileiges de ladite ville Accordé est tant sur cet article comme pour touttes les entreprises faites par lesdits deffendeurs ou aucuns d'eulx ou préjudice dudit Monseigneur le Duc de ses seignouries droits et noblesses comme pour ses dommaiges et interests par luy soutenus pour occasion des faiz dessusdits comme aussi pour les fraiz et despens qu'il a fais en la poursuite desdiz procés et autremant que lesdiz Maire eschevins et habitans paieront audit Monseigneur le Duc à sa volunté la somme de huit mile frans d'or et parmi ce demoureront lesdiz deffendeurs quittes et delivrés de toutes les choses dessusdites Et en tant que la main dudit Monseigneur le Duc qui estoit mise à la Mairie de ladite ville de Dijon pour les causes dessusdites ou autres ladite main est levée au proufit desdiz Maire eschevins et habitans Item sur ce que lesdiz Maire eschevins et habitans ont supplié audit Monseigneur le Duc qu'il leur veuille confermer leurs chartres et privileiges yceux Maire eschevins et habitans mettront lesdites chartre et privileges es mains de messire Jehan Potier arcediacre de Lengres conseiller et secretaire dudit Monseigneur le Duc à ce par ledit Monseigneur le Duc commis et député lesquelles chartres et privileges ledit Monseigneur le Duc confermera par ses lettres en tant que lesdiz Maire eschevins et habitans en ont deuement usé Et dès maintenant les parties se partiront de court et à tenir ce présent accord seront condempnez par arrest et veuillent et consentent lesdites parties que par ce présent accord tous ceulx et celles qui estoient adjournez en parlement pour reprandre ou délaissier les procés et arremans desdites causes qui n'ont point reprins et autres quelxconques qui estoient en ce procés et à qui ce touche et touttes les parties dessusdites sont hors de court et de tout procés sans despens et sans amende Qua quidem cedula sic ut predicatur dicte curie nostre tradita ipsa curia consentientie ad hoc procuratore nostro generali pro nobis ad omnia et singula superius contenta tenenda complenda ac firmiter et inviolabiliter observanda partes predictas et earum quamlibet prout unamquamque ipsarum tangit seu tangere potest ad requestam et de consensu magistrorum Petri de Tornodoro dicti patrui nostri procuratoris ex una parte et Hugonis Virtuosi Majoris dicte ville Divionensis pro se propter hoc in dicta curia nostra personaliter presentis nec non Aymonis de Vesoul et nomine procuratoris scabinorum et communitatis dicte ville Divionensis virtute certorum procuratorium penes dictam curiam nostram existentium ac etiam procuratorii inferius inserti ex altera per arrestum condempnavit et condempnat eaque ut arrestum ejusdem curie teneri compleri et observari ac executioni demandari voluit et precepit manumque dicti patrui nostri in Majoria dicte ville Divionensis appositam dicta curia nostra levavit atque levat si sit opus secundum cedule supra dicte tenorem et formam Tenor vero procuratorii de quo superius fit mentio sequitur sub hiis verbis A tous ceulx qui verront et ourront ces présentes lettres nous le Maire les eschevins et toute la commune de Dijon pour ce au cor et au cry si comme il est accoustumé especialement assemblez au cimetiere de Saint Benigne de Dijon le dyemoinge après la feste de la Nativité saint Jehan Baptiste l'an mil CCCIIII et six salut Savoir faisons que nous tant conjointement comme divisément sans rappeler nos autres procureurs avons fait constitué ordonné et estably et par la teneur de ces présentes lettres faisons constituons ordonnons et establissons nos procureurs généreaulx et certains messaiges espéciaulx nos chiers et bien amez honorables hommes et saiges maistre Aymé de Vesoul maistre Pierre de Tournerre maistre Nicole de l'Espoisse maistre Laurent Lami maistre Guillaume de la Bruyère maistre Laurent Sourreaul maistre Raoul Drobille maistre Raoul Rahyer maistre Guy de Villers maistre Jehan Poupart maistre Thomas Laurent tous procureurs en parlement du roy nostre Sire à Paris et Phelippe Courtot de Dijon et un chacun d'eulx un seul pour le tout porteur ou exhibeur de ces présentes lettres en telle manière que la condition de l'occupant ne soit meilleure du subséquent ou preur mais ce que par l'un d'eulx sera encommancié par l'autre puisse estre poursui medié terminé et mis à fin en toutes nos causes querelles et besoingnes meues et pendans en la court de Parlement du Roy nostre sire contre quelconque seigneur ou personne que ce soit ausquels nos procureurs cy dessus nommez et à un chacun d'eulx en seul et par le tout nous lesdiz constituons tant conjointement comme divisément avons donné et donnons par ces présentes plénière général et libérale puissance auctorité avecque mandement espécial de faire les choses cy après narrées escriptes et devisées C'est à savoir de passer octroyer consentir et accorder en ladite court de Parlement du Roy nostre sire à Paris les prononciations et rapors faits et à faire par nostre très redoubté seigneur Monseigneur le duc de Bourgoingne et touttes les pactions traittez acords et convencions par nous et noz procureurs par nous et en noz noms tant ceulx nommez en ces présentes comme autres faiz et à faire parmi le bon plaisir licence et consentement de ladite court de Parlement du Roy nostre sire de tous débaz questions querelles procès controverses et descors estans meuz et pendans en ladite court de Parlement entre le procureur et en nom de procureur de nostredit seigneur Monseigneur le duc de Bourgoingne adjoint avec lui le procureur du Roy nostre sire d'une part et nous lesdits constituans tant conjointement comme divisément d'autre part entre les religieux abbé et couvent du monastère de Saint Bénigne de Dijon adjoints avec eulx lesdits procureurs du roy nostre sire et de nostredit seigneur Monseigneur le Duc de Bourgoingne d'une part et nous lesdits constituans tant en commun comme en particulier d'autre part et aussi entre vénérables saiges et discrettes personnes doyen et chapitre d'Ostum d'une part et nous lesdits constituans d'autre part de procurer dot pourchassier la licence et consentement de ladite court de Parlement et icelle obtenir et de renoncer du tout en tout esdits procès et départir d'iceulx et de ladite court et généralement de faire octroyer consentir passer et accorder touttes autres et singulières choses que nous lesdits constituans tant conjointement comme divisément et tant en particulier comme en commun ferions et faire pourrions et devrions es choses dessusdites les circonstances et dependances d'icelles se présens y estions en nos propres personnes mesmement se auculne chose y a qui de sa nature requere mandement et commandement especial Promettans nous lesdits constituans et chascun de nous partant comme il lui touche et appartient peut toucher et appartenir conjointement ou divisement par nos sermens les mains tenduës et levées hault contre les saints et soubs l'ypotecque et obligation des biens de notre dite commune présens et advenir quelxconques avoir et tenir ferme estable et agréable tout ce que par nosdits procureurs et chascun d'eulx sera faict dit procuré octroyé consenti passé et accordé es choses dessusdites les circonstances et dépendances d'icelles ester à droit et payer l'adjugier se mestier est et nosdits procureurs et chacun d'eulx relever de touttes charges de satisfaction En tesmoing de laquelle chose nous avons faict mettre à ces présentes le seel de notre dite commune Faites et données en présence de Regnault Darvez de Jehan Yverneaul Jehan Pointquarrey Mathe Malpaie Parisot Bourgeois et Demoingeot Pointquarrey demeurans à Chastillon sur Seigne Tesmoings à ce appelés et requis l'an et le jour dessusdit