Charter Document - 05100252

Nos maitres Lamberz de Dijon arcediacres de Lecoys en l'église de Loingres Et nos maitres Pierres chanoynes et officiaux de Loingres Et Viarz de Sein Baroyng bailliz de Loingres façons savoir à touz ces qui verront et orront ces présentes letres que con li borjois de Bese haussient apelé à mon seingnor l'avesque de Loingres contre l'abbé et lou covant de Bese de plusors gries qu'il disoient que li diz abbé et li covanz lor aveent faiz Et nos havest commandé mes sires l'avesques oiir et delivrer la cause dou dit apel Et d'autre part se pleynnessient li diz abbés et li covanz des diz borjois meintes choses Nos les descorz et les plaiz qui esteait entre les dites parties par davant nos avons apaisiez de la volunté et de l'essantement des dites parties et por lou consoil de bones genz en teil menière Ce est à savoir que les noveles censies que le dit borjois doivent audit abbé et au covant de Bese l'abbés de Seint Benigne de Dijon et l'abbés de Seint Estienne doient regardeir et savoir à queil menoie elles fuerent estaublies ou premisses à payer et à teil menoie le dit borjois les paieront dos ci en avant ou à la vaulue di celi Après des censies enciennes le dit abbé de Seint Benigne et de Seint Estienne de Dijon doivent enquérir des costumes et des usaiges de l'aveschiés de Loingres et dou duchesme de Bergoysme ou des autres costumes voisines dou reaulme comment on ha acostumé à payer tex censes Et ansinc comme il lou trouveront selonc les usaiges et selonc les costumes le dit borjois seront tenu dou payer les dites censes Et se il ne trovoient certains usaiges ou certeinnes costumes ledit abbé de Dijon lou fereent et regardereent à bone foy comment on les devroit payer et aussi comme il sera regardé et fait et ordené por les diz abbez de Dijon lidit borjois seront tenu de payer les dites censes il et lor hoir à touz jorz mais Après il est acordé por nos entre les dites parties que li diz abbés de Bese et le dit covanz doient tenir et gardeir es diz borjois lor bons usaiges droiz costumes et freinchises à touz jorz mais ausi comme il et lor devancier lor ont tenues et gardées jusque au jor que le plaiz en commença Et se il estoit doute d'aucunes freinchises droiz usaiges ou costumes devant dites de ce que li diz borjois mostrereent et fereent savoir audit abbé ou à son commandement li diz abbés de Bese et li covanz lor torreent et gardereent et fereent tenir et gardeir à bone foy Et se aucunes des freinchises usaiges droiz et costumes desdiz borjois en aveent brisies ou enfreyntes lidiz abbés et li covanz il les rapelereent et gardereent et sereent tenu dou rapeleir et dou gardeir Et li dit borjois sont tenu de gardeir et de tenir audit abbé et au covant lor bons usaiges et lor bon droit ausi comme il aveent acostumé eyncos que le descorz est commancest Saul le court de la menoie que doit corre ausi comme le Rois et mes sires l'Avesques l'ont commandé Et est à savoir que l'abbés ha fait protestation que por cieste pais ne por ciest acort il n'entant à renoncier ne ne renonce au droit et à la raison qu'il ha contre ces qui s'an sont aulé en autre seignerie se il ne voloient revenir einz ha retenu tout lou droit et tote la raison contre lor Après il est acordé que le dit borjois serviront l'abbé et li donnent por ces choses trois cens livres de tornois et un marc d'argent desquex li dit borjois ont mises pleges et randaours de gaiges portanz ou menanz par davant nos en la main dou dit abbé Et cieste pais desux dite ausi comme elle est devisée ha promis le diz abbés de Bese pordavant nos en bone foy comme abbés et en parole de verité gardeir et tenir à touz jorz mais et li covanz l'a aussi promis por davant nos en bone foi tenir et gardeir Et Perrenins Perrière et Perrenins Denise borjois de Bese procuraour es diz borjois l'ont promis por lor foi ausi por lor et por lesdiz borjois comme procuraour qui avoient pooir de ce faire ausi comme il est contenu en lor procuration de quoi il ont faite foi pordavant nos à faire à tenir et à gardier à touz jorz mais es diz borgois En tesmoingnaige de ces choses nos avons mis nos seaux en ces présentes lettres lesquex furent donées et faites l'an de nostre Seignor mil dous cens sexante et XVIII ou mois de marz