Charter Document - 05100249

Nos Guido divina miseracione Lingonensis episcopus notum fieri volumus universis præsentibus pariter et futuris quod cum quislibet de hominibus Besuensibus volens ire de villa Besuense versus Divionem bis in anno vel per octo dies precedentes festivitatem beati Johanni Baptisti et per octo sequentes similiter per octo precedentes festum Omnium Sanctorum et per octo subsequentes teneretur solvere domino vel dominis de Bera pro pedagio vel eciam pro conductu pro persona eunte pedes denarium unum pro persona equitante duos eundo et redeundo pro quadriga linea duo pro ferrata ad quatuor similiter eundo et redeundo sicut domini de Bera asserebant Tandem dominus Robertus miles dominus de Bera in præsentia nostra personaliter propter hoc constitutus recognovit se dictum pedagium et conductum vel quocumque alio nomine nuncupetur et quotquod juris in eo ipse vel alii domini de Bera habere poterant vel habebant dictis hominibus Besuensibus vendidisse et in perpetuum quittavisse pro sexaginta et quinque libris stephanensibus quas confessus est coram nobis recepisse a dictis hominibus in pecunia numerata Volens et concedens quod dicti homines possint de cetero ire et reverti quolibet tempore per terram suam libere et sine exactione vel solutione alicujus pedagii vel conductus Promisit etiam dictus Robertus quod contra vendicionem istam nec non conditiones in isto instrumento contentas vel aliquod per se vel per alium de cetero non veniret nec alium venire faciet aut permittet Et quod dictis hominibus super hiis legitimam feret garantiam contra omnes ita quod si contingerit in futurum aliquum vel aliquos dictum pedagium vel conductum vel partem quantumcumque in eo reclamare et propter hoc dictos homines vel aliquem eorum vel etiam bona sua detinere vel impedire seu etiam inquietare vel vexare dictus Robertus et ejus successores dictos homines vel eorum bona propriis sumptibus et laboribus tenerentur requirere et liberare et omnia dampna et constamenta reddere quod propter hoc dicti homines sustinerent Voluit eciam et rogavit nos dictus Robertus quod si ipse vel successores ejus convenciones supra dictas vel aliquam eorum quod absit non observarent quod nos et alii episcopi qui pro tempore erunt vel officiarii nostri dictum Robertum vel ejus successores ad requisitionem dictorum hominum Besuensium vel eorum mandatum excommunicaremus et eorum terram subponeremus interdicto Pro hiis autem omnibus firmiter observandis se per juramentum corporaliter pro eo prestitum et successores suos et omnia bona sua præsentia pariter et futura dictus Robertus specialiter obligavit Hanc autem venditionem et conventiones supra dictas domina Margareta uxor dicti Roberti voluit et laudavit Promittens per juramentum suum quod contra eas per se vel per alium de cetero non veniet vel alium facere venire aut permittet Renunciaverunt præterea dictus Robertus et ejus uxor in hoc facto exceptioni non numerate vel non solute pecunie doti et in factum et beneficio rei nunquam dimidia justi precii vendite et omni beneficio juris civilis vel canonici seu consuetudinarii sibi competenti vel quod posset competere in futurum Et dicta domina specialiter renunciavit dotis privilegio et juri pignoris vel ypotece tacito vel expresso Ut autem hec omnia rata de cetero sint et firma nos ad preces dicti Roberti et ejus uxoris præsentibus litteris sigillum nostrum duximus apponendum Nos vero Henricus dominus Mirabelli et senescallus Burgundie de cujus feodo domus domini de Bera cum medietate ejusdem ville movent et Henricus de Tar dominus de Maigne de cujus feodo quarta pars dicte ville movet omnia supra dicta volumus laudamus et approbamus In cujus rei testimonium et robur nos dominus Mirabelli signum nostrum una cum sigillo reverendi patris Guidonis Dei gratia Lingonensis episcopi præsentibus fecimus appendi Et nos Henricus de Tar dominus de Maigne quia sigillum proprium ad presens non habemus sigillo viri religiosi et honesti Amedei abbas Sancti Stephani Divionensis in hiis usi sumus Acta sunt hec anno Domini MCC quinquagesimo nono mense decembris