Charter Document - 05100247

Charter Document - 05100247


Charter Number: 05100247
Cartulary Title: Chartes de communes et d'affranchissements en Bourgogne
Charter Language: Latin
Charter Origin: Religious
Charter Type(s): Sale
Date: 1253
Date type: Internal, A.D.
Resource Link(s):

Charter:

Guido miseratione divina Lingonensis episcopus universis præsentes litteras inspecturis salutem in Domino Noverint universi quod cum discordia verteretur inter venerabiles et religiosos viros G Dei gratia abbatem et conventum Besuensem ex una parte et burgenses ejusdem ville ex altera super eo quod dicti abbas et conventus dicebant dictos burgenses debere bennevenutam abbati qui de novo instituebatur in ecclesia Besuensi Quam bennevenutam petebant pro abbate qui modo preest instituto de novo dictis Burgensibus in contrarium asserentibus quod nunquam bennevenutam solverant nec solvere consueverant nec audierant eorum antecessores solvisse aliquo tempore retroacto Tandem bonis viris mediantibus super hoc inter partes predictas pax amicabilis intervenit in hunc modum Videlicet quod anno elapso postquam in ecclesia Besuensi abbas de novo fuerit institutus burgenses qui pro tempore fuerint reddent abbati Besuensi ratione bennevenute ipsius centum libras stephanenses nec aliud occasione bennevenute abbas Besuensis ab ipsis burgensibus petere potest nec debet Et si infra annum quo de novo abbas institutus fuerit idem abbas decederet vel renoveretur a regimine abbatie Besuensis dictas centum libras pro bennevenuta reddere non tenerentur Statutum est nihillominus et divisum et a dictis abbate et conventu et burgensibus Besuensibus concorditer et amicabiliter pro utilitate ecclesie et ville Besuensis acceptum quod de communi abbatis et burgensium Besuensium consensu et electione concordi eorumdem abbatis et burgensium in una quaque porta exitus ville predicte ponetur et instituetur janitor qui de villa sit superdicta et qui fidelitatem ecclesie et ville Besuensi antequam pro janitore recipiatur jurabit et jurare tenebitur Et quotienscumque janitorem sic positorum mori vel aliquid foris facere contigerit vel aliter abbati et burgensibus placuerit alios janitores vel alium janitorem instituere communi et concordi voluntate et electione abbatis et burgensium predictorum poterunt ipsi abbas et burgenses Janitores autem sic instituti quiti erunt penitus in villa Besuensi ab omni placito generali Et hec omnia facta fuerunt salvis libertatibus et bonis usibus et consuetudinibus ecclesie et ville Besuensis In quorum omnium authoritatem et testimonium ad preces et requisitionem abbatis et conventus et burgensium Besuensium sigillum nostrum præsentibus litteris duximus apponendum Actum anno Domini MCC quinquagesimo tertio mense junio