Charter Document - 05100172

Nous Aignès fille dou saint roy Loys duchesse et nous Eudes filz de laditte Aignès dux de Bourgoinne facons savoir à touz ceuls qui verrunt et orront ces présentes lettres que comme notre proudomme habitant de la ville de Nuiz nous haient denuncié senefié en complainnant que notre prévost de Nuiz qui hont esté pour le temps passé et qui or sunt se sont enforcié et encour s'enforcent de lever amandes dou sanc fait à Nuiz sanz clam faire à eux et sanz malice de celui qui le dit sanc ha fait et encour nous hont denuncié que li prevost qui pour le temps hont esté hont usé de enquérir dou sanc fait sans clam et sanz malice si com dessus est dit et aussi de celui qui le scet se il ne lou denunce et de lever amandes Les proudommes de la ditte ville contredisant et réclamant au contraire Si nous hont supplié que nous cest usaige qui est contre humainne nature et tant grandement contre raison nous volsissions oster en pidié et en amone à la fin que il et ceux qui pour le temps seront puissient vivre plus en pais desouz nous et desouz noz successours Nous Duchesse et Dux desus diz enclinans à la supplicacion des desus diz laquelle nous samble juste et raisonnable de certainne sciance et délibéracion hahue à notre Consoil ledit usaige de enquérir et de lever amandes de sanc fait sanz clam sanz malice et sanz fraude et de lever soixante souz de celui que le sauroit et reveler ne le voroit ostons rappellons et adnullons du tout en tout pour nous et pour noz successours en tant come à chascun de nous appartient et puet appartenir c'est assavoir à nous Aignès duchesse pour raison de douaire et à nous Eudes duc desus dit pour raison de héritaige Et deffandons par la tenour de ces présantes lettres à noz prévoz et officiaux qui pour le temps à avenir gouverneront la ditte ville de Nuiz n'enquérient ne levient amande de sanc fait en la ditte ville sanz clam sanz fraude et sanz malice de celui qui fait l'aura ne de celui qui ne lou denoncera si com desus est dit Promectans en bone foy pour nous et pour noz successours non venir en contre les chouses desus dittes par nous ne par autres tasiblement ne expressement En tesmoing de laquel chouse nous havons fait à mettre noz seaulx en ces lettres que furent faites et données en Jungny le diemanche après la Saint Pierre en fevrier l'an de grâce mil trois cenz et dis sept