Charter Document - 05100150

Jehan duc de Bourgoingne conte de Flandres d'Artois et de Bourgoingne palatin seigneur de Salins et de Malines à notre bailly et à tous nos autres justiciers et officiers ou à leurs lieutenants salut Oye l'umble supplicacion de nos bien amez les Maire eschevins et habitans de notre ville de Beaune contenant que combien que par leurs previléges libertez et franchises ils ne soient tenuz d'aler hors de ce royaume en quelque armée qu'ils les mandrons que ce ne soit de leur bon grey et consentement Toutes voyes soubs umbre et pour ce que à notre requeste et prière les diz supplians nous envoièrent nagguères vint hommes armez et dix huit arbalestriers au siége qui adonc estoit devant Valexon hors dudit royaume ils se doubtent que ou temps à venir et à eulx ou à leurs diz previléges libertés et franchises ne leur peust tourner à aucune conséquence se ils n'en avoient noz lettres de non préjudice si comme dient Desquelles ilz nous en ont très humblement fait supplier Pourquoy nous ces choses considérées inclinant à la dite supplicacion aux dessus nomméz Maire eschevins et habitans d'icelle notre ville de Beaune avons octroyé et consenti par ces présentes de grâce espécial octroyé consentons que ce qu'ils ont envoiés les dis XX hommes d'armes et dix huit arbalestriers audit siége de Valexon qui est hors de ce dit royaume comme dit est ne leur tourne ou peut tourner à eulx ne à leurs devant diz previléges franchises et libertez à aucune conséquence ou préjudice ores ne pour le temps à venir Si vous mandons et à chacun de vous si comme à lui appartient que de notre présente grâce et octroy les diz supplians et chacun d'eulx faites souffrez et laissez plainement et paisiblement joïr et user sans leur donner ou souffrir estre fait ou donné aucun destourbier ou empeschement au contraire Donné à Paris le XX de fevrier l'an de grâce mil CCCC et neuf Par Monseigneur le Duc à votre relation de Sauls