Charter Document - 05100147

Jehan duc de Bourgoingne conte de Flandres d'Artois et de Bourgoingne palatin seigneur de Salins et de Malines A notre bailli de Dijon ou son lieutenant salut Savoir faisons que comme pour certain débat meu nouvellement entre Perrenot Quinot l'aisné et Milot le Changeur bourgeois de notre ville de Beaune et les autres bourgeois et habitans de notre dicte ville sur le fait et pour ocasion de l'eslection de la Mayerie d'icelle ville qu'il fut faicte le jour de la feste de la Nativité de Saint Jehan Baptiste darnierrement passée la dicte Mayerie ayt esté et soit par vous mise à notre main et encore y teigne et au gouvernement d'icelle ait esté comme parmi et soubs notre dicte main par nos amés et féaulx les gens de notre Conseil à Dijon notre bien amé conseiller maistre Jehan Peluchout clerc licencié en lois que dès lors jusques à présent a gouvernée la dicte Mayerie et il soit ainsi que les dicts Perrenot Milot et les autres bourgois et habitans de la dicte ville soyent en bon acort du fait de la dite election et pour ce requis notre dite main mise en ycelle estre levée et ostée Nous à la requeste d'iceulx ycelle nostre main avons levée et ostée levons et ostons par ces présentes de la dite Mayerie en deschargent du tout le dit maistre Jehan du dit gouvernement d'icelle lequel par ces mesmes présentes nous en deschargeons et voulons qu'il s'en départe et faicte départir se mestier est lui satisffait de ses gages raisonnables Si vous mandons que notre dicte main ayés et tenez pour levée et ostée de la dicte Mayerie et que contre la teneur de cestes ne mectez faictes ou souffrés estre mis aucun empeschement ou destorbier Car ainsy nous plait il et voulons estre fait et aus diz expousans l'avons octroyé et octroyons par ces présentes nonobstant lettres mandements ordonnances ou deffenses à ce contrayres Donné en notre dicte ville de Beaune le Xe jour de janvier l'an de grace mil CCCC et huit Par Monseigneur le Duc à votre relation de Sauls