Charter Document - 05100143

Charter Document - 05100143


Charter Number: 05100143
Cartulary Title: Chartes de communes et d'affranchissements en Bourgogne
Charter Language: French
Charter Origin: Lay
Charter Type(s): Order
Date: 1372
Date type: Internal, Calendar
Resource Link(s):

Charter:

Du venredi xi de juing mil CCCLXXII en la Chambre des comptes de Monsei seignur le Duc ou estoient Monsieur l'abbe de Saint Estienne de Dijon messire Pierre de Tinteville chancellier de Bourgoigne maistre Richard Bonot Dimenche de Vitel Guillaume de Marcilli bailli de Chalon Jehan de Courbeton maire de la ville et commune de Beaune s'est consenti aujourdui que de certain descort ou débat qui estoit entre Pierre de Baugys escuier bailli de Dijon d'une part et ledit Jehan de Courbeton d'autre part à cause de certain prisonnier appellé Guillaume de Beroing lequel ledit bailli avoit pris et arresté si comme il disoit en la ville de Beaune pour certaine cause et après ce ledit bailli voult envoier ledit prisonnier en certaine prison par ses commis lesquels ne le peurent avoir pour ce que ledit Maire disoit qu'il estoit prisonnier de la ville Et pour ce ledit bailli fist commandement audit Maire que ledit prisonnier illi rendit duquel commandement ledit Maire appella Pour laquelle chose ledit bailli mist verbaument ladite Mairie à la main de Monseigneur dont ledit Maire appella encores Les gens du Conseil dudit Monseigneur le Duc en ordenent selon ce que ils verront estre à faire de raison et en leur conscience Et a promis [] à tenir ce qui par lesdites gens du Conseil en sera dit et ordené et avec ce a renoncié aux dites appellations Et outre ledit Maire a fait audit bailli rendue dudit prisonnier par signe qu'il li a baillé Et ce fait y cellui bailli li a fait recréance de ladite Mairie mise verbaument comme dit est à ladite main