Charter Document - 05100141

Jehan par la grâce de Dieu roy de France savoir faisons à tous présens et à venir que nous les libertez franchises immunitez chartres privileges et confirmations d'icelles donnés et octroiés par noz predecesseurs Dux de Bourgogne aux Majeur eschevins et commune de nostre ville de Beaune si comme elles sont escriptes volons louons et confirmons de certaine science par ces præsentes promettons pour nous et nos hoirs par nostre serment donné corporelment sur saints Euvangiles de Dieu les choses dessus dites et chascuns d'icelles tenir et fermement garder senz jamais venir encontre par nous ou noz gens Et volons que semblablement noz hoirs et successeurs quant ils venront au gouvernement dudit Duchié le jurent s'il en sont requis Et que ce soit chose ferme et stable à tousjours nous avons fait mettre nostre scel à ces lettres Che fut fait et donné en l'esglise Nostre Dame de Beaune le vingtiesme jour de janvier l'an de grâce mil trois cent soixante et un Par le Roy presens les Doyens de Troyes et de Noyons maistre Jehan Chalemart maistre Aubry Rousel et plusieurs autres P Blanchet