Charter Document - 05100140

Phelippes duc de Bourgoigne conte d'Artoys et de Bourgoigne palatin et sire de Salins savoir faisons à tous ceuls qui verront et orront ces présentes lettres que nous les libertés franchises immunités chartres priviléges et confirmacions d'icelles donnéz et ottroyés pas nos predecesseurs dux de Bourgoigne aus Maieur eschevins et commune de notre ville de Beaune si comme elles sont escriptes voulons louons ratiffions confermons et approuvons de certaine science Promettans pour nous et nos hoirs par notre sarrement donné corporelment sur sains evangiles de Dieu présens les personnes cy dessoubs escriptes les choses dessus dictes et chascune d'icelles tenir et fermement garder sens jamais venir encontre par nous ou nos gens et voulons que semblablement nos hoirs et successeurs quant ils venrons au gouvernement dudit Duchié le jurent s'ils en sont requis et que ce soit ferme et estable à tous jours Nous avons ou tesmoin de ce fait mettre notre grant seel en ces lettres Ce fu fait et donné en l'eglise Notre Dame de Beaune Présens Monseigneur l'évêque de Chalon notre très chèr oncle le Conte de Montfort noz amés et feaulx cousins Messire Hugue de Vienne sire de saint George et de sainte Croix Messire Eude de Grancey sire de Pierrepont Messire Eudes de Montagu sire de Coiches Messire Jean de Montagu sire de Sombernon Messire Jehan de Froulois sire de Molinet et plusieurs autres le second jour du mois de fevrier l'an de grâce mil trois cent cinquante neuf Par Monseigneur le Duc présens les dessus nommés et plusieurs autres