Charter Document - 05100069

En nom de notre Seigneur amen l'an de l'incarnation d'icellui courant mil trois cens quatre vins et seze le trezieme jour du mois de mars environ dix heures avant midi dudit jour en l'église des Jacobins de Dijon ou lieu où l'on a accoustumé apaller faire et traictier les besoingnes de ladite ville par les Maire et eschevins d'icelle ou quel lieu estoient le plus grand partie des bourgeois et habitans de ladite ville de Dijon en la présence de moy Jehan Lebon de Dijon clerc coadjuteur du tabellion dudit lieu pour Monseigneur le duc de Bourgoingne et des tesmoings cy apres escrips honorable homme Guillaume Chenilly lors gouverneur de la Marie justice et exercité d'icelle ville de Dijon pour et en nom de mondit seigneur Duc estant laquelle Marie justice et exercité d'icelle estoit en la main de mondit seigneur ycellui Guillaume Chenilly par vertu de certaines lettres à lui adressans de discrete personne et saige messire Jehan de Verranges clerc licencié en lois et en decret bailli de Dijon fit restablissement de ladite marie justice et exercité d'icelle aux dis habitans et bourgeois illec présens et recevant ou nom et au prouffit d'icelle ville et commune et en leva ycellui Guillaume et osta la main de mondit seigneur mise en ycelle marie rendit l'esvangile dénotant la justice d'icelle ville et seel aux causes de la court de ladite marie lesquelx seelx et esvangiles il bailla de fait réalment à honorable homme maistre Odart Douhay en soy desmetant et hostant du tout en tout en nom de mondit seigneur dudiz gouvernement et exercité d'icelle marie Lesquelx seelx et esvangiles ycellui maistre Oudart prit et accepta ou nom prouffit et honneur de ladite ville De ce surquoy Guyenot de Marandeul procureur et en nom de procureur de ladite ville et commune de Dijon demanda à moy ledit Jehan à lui estre fait publique instrument soubs le seel de la court de Monseigneur le Duc de Bourgoingne Auquel Guenot je lui octroya En tesmoing de laquelle chose je li dis Jehan Le Bon ay requis et obtenu le seel de ladite court estre mis ad ces présentes lettres faictes et passées en ma présence de messire Henri le Barrouhier chevalier maistres Hugues le Vertueux Pierre de Jalleranges Jehan Baudot Nicolas de Chevigny et Guiot de Corpssains tesmoins ad ce appellés et requis l'an mois jour heure et lieu dessus dis J Le Bon