Charter Document - 05100060

Jehan par la grâce de Dieu roy de France savoir faisons à tous présens et avenir que aujourd'huy nous avons confermé promis et juré sur les saints évangiles estant sur le grant autel de l'église de Saint Bénigne de Dijon tenir et garder fermement les libertez franchises immunitez chartres et privileges et confirmacions d'icelles données et octroyées de nos devanciers dux de Bourgoigne au Maieur et eschevins et habitans de nostre dicte ville de Dijon si comme elles sont escriptes et aussi lesdiz Maieur et habitans de notre dicte ville estans lors en nostre présence en ladicte église jurèrent qu'ils nous seront loyaus subgiez et vrais obéissans et garderont nostre personne et touz nos droits envers et contre touz et nous leur avons octroyez et octroyons par ces présentes que nos hoirs et successeurs en nostre dit duchié de Bourgoigne jureront et seront tenus jurer publiquement en ladite église de Saint Bénigne de Dijon en leur premier advénement ou dit Duchié qu'ils garderont et feront tenir et garder lesdites libertez franchises immunitez chartres et previleges et confirmacions d'icelles ainsi comme elles sont escriptes et plus à plain contenue es lettres et es chartres données de nos devanciers dux de Bourgoigne aux habitans de nostre dite ville de Dijon et à ce faire et fermement tenir et garder perpétuellement nous obligeons especiaulment et expressement nous nos hoirs noz successeurs et touz ceulz qui auront cause de nous en nostre dit Duchié et promettons en bonne foy lesdites choses tenir et fermement garder à tousjours mes sanz venir encontre par nous ne par autre Et pour ce que ce soit ferme chose et estable à tousjours nous avons fait mettre nostre seel à ces présentes lettres Donné à Dijon le XXIIIe jour de décembre l'an de grâce mil trois cent soixante et un Par le roy P Blanchet