Charter Document - 05100059

Phelippe duc de Bourgoingne conte d'Artois et de Bourgoingne palatin et sire de Salins savoir faisons à tous ceulx qui verront et ourront ces présentes lettres que nous les libertez franchises et immunitez chartres previleges et confirmations d'icelles données et ouctroyées par nos prédécesseurs ducz de Bourgoingne aux Maieur eschevinz et commune de notre ville de Dijon si comme elles sont escriptes voulons louhons ratifions confermons et appreuvons de certaine science promectans pour nous et pour nos hoirs par nostre serement donné corporellement en la présence du corps Jésus Christ et des personnes cydessoubs escriptes les choses dessusdites et chacune d'icelles tenir et fermement garder sans jamais venir encontre par nous ne par autre ne souffrir que autre y vienne Et voulons que semblablement nos hoirs et successours quant il verront au gouvernement du dit Duchié le jurent se ils en sont requis Et que ce soit ferme et estable à toujours mais nous avons en tesmoing de ce fait mettre notre seel à ces présentes lettres Ce fut faict et donné en l'église Saint Bénigne de Dijon présens nostre très chière et très redouttée dame et mère madame la royne de révérend père en Dieu l'arcevesque de Besançon l'evesque de Châlon de nos amez et féaulx cousins le conte de Montbéliart messire Jacques de Vienne sire de Lonvy messire Hugues de Vienne sire de Saint George messire Eudes de Grancey sire de Pierre Pont le sire de Couches le sire de Sonbernon messire Philibert de l'Espinace messire Hugues de Montjeu messire Jehan de Cusance chevaliers et pluseurs le vingtsisiesme jour du mois de janvier l'an de grâce mil trois cent cinquante neuf Par monseigneur le Duc présens les dessus nommés Philibert