Charter Document - 05100057

Jehan ainsné fils du roy de France duc de Normandie et de Guienne conte de Poitou d'Anjou et du Mainne faisons savoir à touz ceulz qui verront et orront ces præsentes lettres que nous avons veu les lettres de bonne mémoire nostre très chier oncle Eudes jadiz dux de Bourgoingne seellées de son grant seel sanz aucune suspicion contenenz la fourme qui s'ensuit Nous Eudes dux de Bourgoigne [] Nous toutes les choses et singulières contenuës es lettres dessus transcriptes aians fermes et aggréables icelles et toutes les libertez franchises immunitez chartres previleges et confirmacions données de notre dit oncle et de ses prédécesseurs es dits habitanz de la dicte ville de Dijon les quels nous ayanz le gouvernement et bail du duchié de Bourgoigne et de notre très chier et bien amé cousin Phelippe duc de Bourgoingne moindre d'aage avons juré en l'église de Saint Bénigne de Dijon et octroié et promis tenir et garder fermement tout en la fourme et manière que nostre diz oncle et ses predecesseurs l'ont fait ou temps passé ainssi comme il est plus à plain contenu es chartres libertez et franchises des dits Maieur eschevins et commune de Dijon et ycelles en nom que dessus voulons loons approvons et par la teneur de ces présentes lettres en tant comme il nous appartient de notre certaine science confirmons et icelles en nom que dessus promettons en bonne foy tenir et garder sans corrumpre ne venir encontre sauf nostre droit et le droit de nostre dit cousin et le droit d'autruy Et pour ce que ces choses soient plus fermes et plus estables nous avons fait mettre nostre seel à ces présentes lettres Donné à Dijon l'an de grace mil troiz cenz et cinquante ou mois d'avril Par monseigneur le duc Fouvanz