Charter Document - 05100049

Nous Robers dux de Borgoigne façons savoir à touz cels qui verront et orront ces præsentes lettres que comme li Maires li escheviz et li commune et li habitanz de la ville de Dijon hayent volu et outroyé que de l'emande que nos demandiens a aux por raison de plusours injures que nos disiens estre faites à Gillet d'Auxois clerc en façent nostre servise et nostre office nos puissons faire raison à nous et à aux sor ladite emande et en puissions a aux condamner ou assorre selonc ce que droiz et raisons sera Nos volons et outroyons por nos et por nos hoirs que porce que il nos hont donée pooir de coignitre et de pronuncier l'emande dessusdite en ce fait nuns préjudices ne soit faiz à lors privileges ni à lor chartres en cestu cas ou en semblauble ou temps à avenir ains quant es cas à asvenir nos volons que lor privileges soient saulz et nostre droiz auxi en la meniere et en la forme qu'il estoient devant la confection de ces præsentes lettres En tesmoing de laquel chose nos avons mis nostre seaul en ces présentes lettres C'est fait l'an de grâce mil dous cent quatrevinz et dix et huyt ou mois de septembre