Charter Document - 05100048

Nous Roberz dux de Borgoigne façons savoir à touz cels qui verront et orront ces présentes lettres que comme nostre amez Richarz de Montmorot chevaliers çai en arriers nostre bailliz de Dijon hahust fait adjorner pardevant lui Bartholomin l'espicier de Dijon à ses assises de Dijon novelemant passées suz cas de injure que lidiz bailliz proposoit contre ledit Bartholomin c'est à savoir seur ce que il disoit que lidiz Bartholomins en nostre ville de Dijon en maltalant et en courrouz havoit chacié et fait chacier le coutel trait Huguenin le Rousselot nostre tabellion de Dijon et requeroit lidiz Bartholomins seur ce la court dou Maiour de Dijon et que il fust ajornez pardevant ledit Maiour pour faire droit ledit Maiour présent et requerant la court dudit Bartholomin comme de son justisauble ledit baillif disant encontre que nous deviens hauoir la court doudit Bartholomin en cel cas pour ce que il disoit que lidiz Rousselot est et estoit en nostre servise et sur ce lidiz Maires et Bartholomins requérient audit baillif que lor en deist droit Li quex bailliz dist et pronunça par sentence locutoire que lidiz Maires ne devoit hauoir la court doudit Bartholomin en tel cas Et lidiz Maires et li autres prodomes de Dijon nous haient monstré et supplié que nous ne veuillessins pas user de ladite intellocutoire comme elle fust donée si comme il disoient en lor grief et ou préjudice de lor préviléges de la commune de Dijon Nous oye la requeste doudit Maiour et des prodomes volons et ottroions que ladite intellocutoire donnée par ledit nostre baillif ne tiegne et ne face préjudices es préuilaiges de ladite commune ne à nous auxi et que pour ladicte intellocutoire droiz ne nous soit acquis contre ladicte commune ne ladicte commune contre nous Et volons et ottroions que nonobstant ladite intellocutoire li prévileiges et les chartres de ladicte commune demorint en lor force et en lor valour si commil estoient deuant ladicte intellocutoire En tesmoignage de laquel chose nos hauons fait mettre nostre seaul en ces présentes lettres Ce fuit faiz et donnez à Beaune le lundy après le mois de Pasques l'an de grâce mil CCIIII et dixsept