Charter Document - 05091003
| Charter Number: | 05091003 |
|---|---|
| Cartulary Title: | Chronique de Saint-Pierre de Bèze [Chronique de l'Abbaye de Saint-Bénigne de Dijon: suivie de la Chronique de Saint-Pierre de Bèze] |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 0652 - 0673 |
| Date type: | Assigned |
| Resource Link(s): |
|
Charter:
Tempore igitur Clotharii Regis cum locus iste copiosissime ditatus fuisset et Religionis studio floreret inimicus tocius boni Diabolus omni conamine efficere voluit ut bona que ibi fideles quique donaverant inde auferrentur et si fieri potuisset in perpetuam oblivionem traderentur Nam mortuo Amalgario Duce Francis inter se discordantibus et intestino furore inter se dimicantibus et terras sue potestatis bello plusquam civili vastantibus contigit hoc Monasterium rabiem talium perpeti et dampna rerum omnium sustinere in tantum ut etiam instrumenta Cartarum et donationum que prefatus Amalgarius aliique Deum timentes et honorantes eidem Monasterio contulerant tollerent et in perditionem darent Sed hanc jacturam predictus Waldelenus Abbas relevare satagens egit cum Sichelmo Duce tunc in Burgundia Ducatum agente ut relationem acciperet rerum ipsius Monasterii multorum bonorum hominum confirmatam consensu et subscriptionibus Tali igitur aucthoritate fretus ad Regem Clotharium se contulit eique cuncta innotuit et ut ejus Preceptum ad perpetuam tuitionem mereretur super hoc pacto expetivit Cujus peticioni predictus Rex assensum prebuit et suam preceptionem clementer concessit Quod ex ipsis conscriptionibus melius edocebimus