Charter Document - 05090329
| Charter Number: | 05090329 |
|---|---|
| Cartulary Title: | Chronique de Saint-Pierre de Bèze [Chronique de l'Abbaye de Saint-Bénigne de Dijon: suivie de la Chronique de Saint-Pierre de Bèze] |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1163 - 1179 |
| Date type: | Assigned |
| Resource Link(s): |
|
Charter:
Rerum mundanarum varietas quam multimoda sequitur defectio sapientem ducit ad consilium ut ad cautelam providentie ne si quid boni fecerit pereat mentis oculum extendat in futurum Quicquid enim in humanis agitur aut transcursu temporis aut oblivionis nebula cicius aboletur nisi sit quod in exemplis Patrum et in usu sancte cognoscimus Ecclesie elemosynas et bona que sancti viri operantur opera litteris propter memoriam studeamus annotare Qua propter ego Gothefredus Dei gratia Lingonensium Episcopus notum facio omnibus tam presentis quam futuri seculi fidelibus venerabilem fratrem nostrum Widricum Besuensem Abbatem presentiam nostram adiisse et devote supplicationis precibus postulasse ut Ecclesias quas tenuit Domnus Remigius Belmontensis Castri Presbyter quas siquidem bone memorie antecessor noster Domnus Wilencus Lingonensis Ecclesie Presul Domno Girardo Abbati Besuensium antea dederat ut firmior esset donatio iterato donarem et auctoritate nostra roborarem ac propter devitandas malorum hominum calumpnias quas Ecclesiastica semper nititur devitare prudentia sigillo nostro sigillarem Dono igitur salvo jure Lingon Ecclesie Deo et sancto Petro et venerabili fratri nostro Widrico Abbati Monachisque Besuensis Cenobii Ecclesias quas sicut dictum est Remigius Presbyter tenuit Ecclesiam videlicet sancti Martini cum Capella S Bartholomei et Ecclesiam de Auxiliaco et Ecclesias de Campaniis S videlicet Juliani et S Hilarii et Ecclesiam de Domna Petra auctoritate confirmans Pontificali ne quis amplius Abbatem vel fratres Besuensis Cenobii de tenore harum Ecclesiarum exturbet aut audeat inquietare aut alicujus controversie fraudibus usurpare Quod si quis presumserit proprio reatu exigente sententia anathematis se cognoscat subjacere