Charter Document - 05090193

Quoniam genus humanum carnis mole corruptibili preoccupatum labilis ac defective memorie contraxit vitium bene visum est predecessoribus nostris ut quicquid ratum et insolubile teneri vellent fideli litterarum custodie commendarent Nos igitur eadem usi ratione ea que subtitulantur ne quandoque delerentur oblivione retinere studimus litterarum traditione Ego itaque Rotbertus Lingonensis Episcopus Humberto de Fontvenz Lingonensis Ecclesie Casato pro servitio ejusdem Ecclesie interfecto capellam prenominati castri Ecclesie Besuensi in cujus cimiterio eum sepelivimus laude et consilio coujugis sue fratrumque suorum ejusdem castri omnium casatorum perpetualiter tenendam concedimus quatinus per interventionem beati Petri Principis Apostolorum et orationes Monachorum ibi Deo servientium suorum obtinere valeat veniam delictorum Ita etiam hoc donum Lingonis im plenaria Synodo tenendum dijudicamus ut si quis Clericus vel Laicus de beneficiis ad capellam premissam pertinentibus preter voluntatem Monachorum Besuensium aliquid facere presumat ordinis sui periculo si Clericus sit si Laicus excommunicationi donec resipuerit subjaceat Hujus dationis testes sunt Willelmus Comes Burgundiorum Rainaldus filius ejus Humbertus Rufus et frater ejus Wido Wido Rufus et ceteri casati Facta sunt hec regnante Philippo Episcopante Rotberto Stephano dictante Cancellario In illo tempore huic cenobio preerat Domnus Josbertus Abbas vir totius simplicitatis et Religionis sed quia in Ecclesia Dei alii sunt murus edificati cum propugnaculis alii ostium compunctum tabulis cedrinis hic vir quia non poterat sicut murus expugnare domus Dei inimicos exterius existentibus innumeribus raptoribus interius periculis in falsis fratribus erat tamen ad aperiendum et claudendum ostium conpinctum tabulis cedrinis quia habebat os ad loquendum et tacendum defloratum diversorum excelsorum et imputribilium Patrum sententiis Prospiciens igitur anime sue bonum esse in superni inspectoris oculis habitare secum optimam partem elegit que non auferetur ab eo Cluniacum namque expeciit et ibi reliquum vite sue exegit pacem querens et pacem inveniens ei qui pax est Angelorum et hominum Christo consociatus Amen Interea Dom Rotbertus prefatus Lingonensium Episcopus bene sollicitus animo volvebat quem huic Ecclesie loco Dom Joseberti Abbatem substitueret Vertebat circumquaque cordis oculum querens cui committeret hujus Ecclesie baculum Nec passus est eum Deus pro voto defraudari sed nec in querendo longi fatigari Est namque cella S Eugendi non multum distans ab urbe Lingonensi in eodem Episcopio in comitatu vero Trecassino Ecclesia in honore B Stephani Protomartyris dedicata in eminenti quodam monte qui Barrus dicitur decentissime fundata Factum est autem ut hic inveniretur quod querendum diu longeque fuerat ut haberetur Preerat namque illi loco Domnus Stephanus quamvis etate non multum maturus pietate tamen et Religione circumfultus in Dei timore et amore et secundum Apostolum in caritate radicatus et fundatus