Charter Document - 05080007

Marguerite fille de Roy de France comtesse de Flandres d'Artois et de Bourgoingne palatine et dame de Salins à tous ceux que ces présentes lettres verront salut Comme nostre amé et féal messire Guillaume d'Estauayer cheualier et madame Nicole sa femme pour Dieu en pitié et pour ausmone ayent donné transporté et délaissé à toujours mais perpétuellement pour eux et pour leurs hoirs et successeurs à l'hopital des poures de nostre ville d'Arbois vne leur maison séante en nostre bourg d'Arbois pour y receuoir et aberger les poures pour Dieu si que cep eut apparoir par leur lettres sçavoir faisons que à l'humble suplicacion du maitre ou gouuerneur dudit hopital nous en regard de pitié et d'aumosne de nostre grace espéciale avons agréable et confirmons par ces présentes le don et transport dessus dis et avec ce de plus habondant grace quittons et donnons au maitre ou gouverneur et hopital dessus dis tout le loux et droit quelconques que pour cause d'iceluy transport nous appartient et deuoit appartenir retenu toutesfois à nous et nos hoirs la cense en lad maison telle et par la manière que deuant l'y auions et ainsy à nous et nos hoirs sera tenu de payer ladite cense le dit maitre et gouuerneur et ses successeurs gouverneurs aud hopital Si mandons à tous nos justiciers officiers et sujets présens et advenirs ou leurs lieutenans et à chacun d'eux si comme luy appartiendra que de nostre présente grace quittance et confirmation comme dessus est dit passent souffrent et laissent par la manière dessus ditte jouïr et user paisiblement doresenavant à toujours mais l'hôpital dessusdit et les gouverneurs d'yceluy sans y mettre ou souffrir estre mis empeschement Donné à Troyes le dernier jour d'octobre l'an de grace mil trois cent soixante et quatorze