Charter Document - 05080002

Nos Oddet de Lielle chanoinnes de Doule et Jehans ses frêres anfanz çayenarer Othenin de Lielle escuiers façons sauoir à touz cex qui verront et orront cex présentes lettres que nos reguerdant nostre profit nom mie decehuz contreinz ne baraté en acune menière mais de nostre bone et propre velonté auons vendu quité et outreié permeignablement a discreites persones et honestes a dayin de l'églisse de Nostre Dame de Doule qui por le temps seray et a chapitre de la dicte églisse et à lour successours achetant hu nom et a profit dou dit dayin et dou chapitre de la dicte ecglisse hu dyene et hu dit chapittre une maison ensamble le chésal le font et les appartenences que sient en la ville d'Arbois en la ruhe deuant l'ospital d'Arbois delez lo chessement que fust Othenin d'Arbois d'une part et delez la maisom que fust Arme de Champeroz que Buenes li Berdons et sa femme tiennent et possèdent à meintenant d'autre part et dure deis la grant ruhe per deuant tant que à la reuière de Cossance et toiche per derriers vne partie dou dit chessement de la dicte maison à l'afeitement Jeham Boichat et dénonçons les dictes chouses estre franches de toutz seruitust sal que de huit souz que ales doyuent à l'oppital de Seint Jeham d'Arbois le jour de feste Seint Martin d'iuert appaier chescom anz censalment Les quex toutes chouses nos auons vendues per le pris de quarante et cinq liures d'esteuenens des quex nos nos susmes tenuz per biem paiez dou dit dayin et dou chapittre de l'églisse de Nostre Dame de Doule en deniers leialment nombrez a temps de la vendue faite Et por ce de la deuant dicte maisom dou chésal dou font et des appartenences por nos et por les nox nos susmes desuetiz et lo dit dayin et lo chapitre por lour et por lour successours por celuy ou por cex qui auroit ou auroient cause de lour en auons enuesti et enuestons et mis et mettons en corporrel possessiom per la baillance de cex lettres Et auons promis et promettons anduy ensamble et chescom per luy per nox seirementz donez et toichiez sus seint euuangile au dit dayin a chapitre de Nostre Dame de Doule et à lour suscessours à celuy ou à cex qui auroit ou auroient cause de lour de toutes les deuant dictes chouses vendues chescom de nos por la moitié et por le tout porter leial guarantie contre toutes genz en toutz lues en toutes cors et deuant toutz jugies et que contre ceste vendue per nos ne per autruy en plet ne fors de plet en appert ne en rescendu dey cy en auant ne vindrons ne consentrons que nions il viene Et renonçons en cest fait per nox donez seirementz à excepciom de pécune qui ne nos soit paié nombrée déliurée et tornée en nostre profit et à toutes autres excepcioms ressonz droitz deffensions aligacions qui nos de droit ou de fait porroient profaitier et au dit dayin et a chapittre de l'églisse de Nostre Dame de Doule ou à lour suscessours nuyere et a droit que dit que général renonciaciom ne vaut Et por toute la tenor de cex lettres fermement tenir et guerder nos enleions nos nox chouses et nox hoirs en la cort et juridiciom ma dame la contesse de Bourgoigne En tesmoignaige de vérité nos auons requis et fait mettre en cex lettres lo seel de la dicte dame dou lequel l'om vse en Arbois Faittes et donées le londi apprès les Bordes l'am Nostre Seignor corrant mil trois cenz et traze